QR Indýstriia jáne infraqurylymdyq damý ministrligi kábil ónimderi men júk tartqyshtardyń ýtilizatsiialyq alymyn alyp tastaý máselesin qarastyrýǵa daiyn. Bul týraly vitse-ministr Marat Qarabaev «Habar» telearnasyndaǵy «Bolshaia nedelia» baǵdarlamasynda aitty, dep habarlaidy QazAqparat.
«Prezident bul másele boiynsha eki baǵytta tapsyrma berdi. Birinshisi – óndirýshilerdiń keńeitilgen mindettemelerin (budan bylai ÓKM – red.) memlekettik organ arqyly retteý. Ol tapsyrma oryndalyp qoidy. Qazir ÓKM tolyǵymen 100 paiyz memlekettik uiym bolyp sanalatyn «Jasyl damýǵa» berildi. Juma kúni biznes jáne qoǵam ókilderimen, belsendilermen kezdesý boldy. Sol kezdesýde Ekologiia ministri Brekeshev myrza ÓKM «Jasyl damýǵa» berilgenin, al ol memlekettik organ ekenin aitty. Bul Memleket basyshysy bergen tapsyrmanyń birinshi bóligi bolatyn», - dedi ministrlik ókili.
Vedomstvo basshysynyń orynbasary ýtilizatsiialyq alym mólsherlemeleri boiynsha túrli pikir bar ekenin, talqylaý barysynda bári eskeriletinin atady.
«Prezident tapsyrmasynyń ekinshi bóligi de oryndala bastady. Ýtilizatsiialyq alym mólsherlemesin qaita qaraý kerek bolǵan. Bul másele boiynsha jumys tobyn qurdyq. 100-dei adam juma kúni júzdesti. Endi kelesi aptada sektor boiynsha kezdesýler ótedi. Iaǵni, kábil ónimderin kádege jaratý alymynyń mólsheri boiynsha bólek, avtomobil alymynyń mólsheri boiynsha bólek, aýyl sharýashylyǵy tehnikasynyń alymy boiynsha bólek, júktartqyshtar alymy boiynsha bólek kezdesýler ótedi.
Alym mólsheri qaita qaraý boiynsha túrli pikirler bar. Kábil ónimderin kádege jaratý alymyn 0 teńgege deiin túsirý usynysy aityldy. Ony da qarastyramyz. Halyqaralyq júk tasymalymen ainalysatyndardyń da usynysy bar. 2025 jyly bizdegi júk tasymaly naryǵyna EAEO tasymaldaýshylary da kiredi. Osy kezeńge deiin júk tartqysh tehnikalardyń ýtilizatsiialyq alymyn tolyqtai alyp tastaý usynylýda. Sonda kábil ónimderi men júk tartqyshtardyń ýtilizatsiialyq alymyn alyp tastaý máselesin qarastyryp jatyrmyz. Árine, eshkim birjaqty sheshim shyǵarǵaly jatqan joq. Belsendiler men qoǵam ókilderiniń pikirin eskere otyryp, óndirýshiler men operatorlardy tarta otyryp sheshim qabyldanady», - dedi Marat Qarabaev.
