Qazaqstandyq jeńil atlet Iasmina Toqsanbaevanyń 2026 jylǵy Aziia oiyndaryndaǵy nátijesi joiyldy, dep habarlaidy ult.kz.
27 qyrkúiekte Japoniiada ótip jatqan Aziia oiyndarynda sportshy 42,195 shaqyrymdyq marafondyq sporttyq júristen jarysty 3:22:20 nátijesimen birinshi bolyp aiaqtaǵan edi.
Alaida jarystan keiin Toqsanbaevanyń nátijesine narazylyq bildirildi. Hattamaǵa «Protested» degen belgi qoiylyp, sportshynyń aiaq kiimi World Athletics talaptaryna sáikestigi boiynsha tekserildi.
Keiin Iasmina Toqsanbaeva áleýmettik jelidegi paraqshasynda nátijesiniń joiylǵanyn habarlady.
«Nátije joiyldy. Biz sońyna deiin kúrestik. Men altyndy qatty syilaǵym keldi. Biraq Jaratqannyń joly bizge beimálim. Bul da meni armanymnyń jolynan toqtatpaidy. Búgin meni myń bólikke bólgendei boldy», – dep jazdy sportshy.
Buǵan deiin narazylyq týraly aqparat shyqqannan keiin Toqsanbaeva: «Tipti menen muny tartyp alsa da, men qaita oralyp, muny taǵy da jasaimyn», – degen edi.
Keiin Aziia oiyndarynyń resmi saitynda sheshim jariialandy. Jarys mártebesi ózgertilip, sportshynyń aty-jónine DQ (Disqualified – jarystan shettetildi) degen belgi qoiyldy.
Osylaisha Iasmina Toqsanbaevanyń 3:22:20 nátijesi resmi túrde joiyldy.
