19 mamyrdan bastap jeńildetilgen avtonesie baǵdarlamasy boiynsha azamattar tarapynan túsken ótinimderdi «Eýraziialyq bank», «Bank Tsentr Kredit» jáne «Halyk Bank» qabyldap jatyr, dep habarlaidy Indýstriia jáne infraqurylymdyq damý ministrliginiń baspasóz qyzmeti.
Jeńildetilgen avtonesie baǵdarlamasy 16 mamyrynan bastaý aldy. Baǵdarlama erejesi Úkimettiń Qaýylysymen 15 sáýirde bekitildi. Baǵdarlama operatory – «Ónerkásipti damytý qory» AQ. Qarjylandyrýdyń jalpy somasy – 100 mlrd teńge («Jasyl Damý» AQ qarajaty esebinen).
Nazar aýdaratyn jait, 18 mamyrdaǵy QR Indýstriia jáne infraqurylymdyq damý ministri Qaiyrbek Óskenbaevtyń tapsyrmasyna sáikes, «Ónerkásipti damytý qory» AQ jeńildetilgen avtonesie baǵdarlamasy boiynsha alynǵan kólikterdi saqtandyrý máselesi týraly azamattar tarapynan túsken saýaldarǵa orai resmi málimdeme jasady.
«Jeńildetilgen avtonesie baǵdarlamasy boiynsha satyp alynǵan avtokólikterdi saqtandyrýǵa qatysty talaptar birinshi baǵdarlama iske qosylǵan 2015 jyldan bastap kúshine engen. Bul – jol-kólik oqiǵalarynan, tabiǵi, jasandy qubylystardan jáne úshinshi tulǵalardyń qylmystyq áreketterinen týyndaityn tutynýshylarnyń nesielik táýekelderin barynsha azaitýǵa baǵyttalǵan shara.
Baǵdarlamada tutynýshynyń saqtandyrýǵa jáne avtokólikti tirkeýge jumsaityn shyǵyndaryn eskere otyryp, jyldyq eń joǵary tiimdi mólsherlemeni 7,5 paiyzdan asyrmaý talabyn saqtaý turǵysynan bankterge shekteý qoiý qarastyrylǵan.
Máselen, kólik quny 10 million teńge bolsa, saqtandyrý tarifiniń mólsheri kólik qunynyń 1,5 paiyzynan (150 myń teńge) aspaýy kerek.
Sondai-aq tutynýshyǵa túsetin qarjylyq júktemeni azaitý maqsatynda qatysýshy bankterge jyl saiynǵy (nesie berýdiń barlyq kezeńine bir mezgilde emes) saqtandyrý týraly shartty joldady», – delingen habarlamada.
Osyǵan orai, baǵdarlama boiynsha alynǵan avtokólik ieleri baǵaly jyljymaly múlkin nesieleýdiń búkil merzimi kezeńinde biryńǵai avanstyq tólemaqy arqyly emes, jeńildetilgen nesieni paidalanǵan árbir jylǵa orai saqtandyra alady.
