Ǵundardyń keń baitaq jerine Dýn Hý memleketiniń hany qyzyǵyp, ony alýdyń amalyn oilastyrdy. Dýn Hý eliniń ámirshisi ǵundardyń jas patshasyna elshisin jiberip:
— Móde dostyǵymyzdy syilasa, maǵan sáigúligin bersin, — deidi.
Sóitip kúnine aishylyq joldardy alatyn júirik tulparyn suratady.
Móde eldiń eń ataqty da aqyldy adamdaryn jinap, ne isteitini jóninde keńes qurady. Keńesshiler oǵan bylai deidi:
— Aishylyq joldy bir kúnde alatyn arǵymaq — ǵundardyń kiesi, sondyqtan, bul atty berýge bolmaidy. Olardyń munysyna Móde bylai dep jaýap qaiyrady:
— Shynymen-aq biz bir atqa bola soǵyspaqshymyz ba? Bul syiymyz odan da bizdiń kórshilermen dostyǵymyzdyń kepili bolsyn. Sóitip Móde júirik tulpardy syiǵa tartady.
Dýn Hý eliniń ulyqtary Módege taǵy da jaýshy jiberip, óz ámirshilerine óziniń eń sulý da súiikti áielderiniń birin tartý etýin surady. Bul uly ámirshiniń namysyna tiip, soǵystyń sebebi bolýǵa tiisti edi. Móde taǵy da óziniń eń aqylgói degen ýázirlerin keńeske jinaidy. Ótinishke ótteri jarylardai ashýlanǵan keńesshiler aitty:
— Bul kórshilerimiz ábden astamsydy. Endi áielimizdi surap otyr. Biz olarmen soǵysýymyz kerek!
Olardy tyńdap bolǵan soń, Móde bylai dep uiǵardy:
— Arǵymaq ta, áiel de — el tynyshtyǵynyń kepili bolsyn.
Sóitip ámirshige áielin de attandyrdy…
Endi meimanasy tasyǵan ámirshi áskerin jiyp, batysqa, dál ǵundardyń shekarasyna jyljyp keldi.
Ǵun ordasy men Dýn Hý eliniń aralyǵynda shóp te óspeitin, sýy da joq bir pushpaq jer jatqan bolatyn. Kóp zamandardan beri bul jerde eshkim meken etpegen, shekara dál osy aradan ótedi. Ámirshi Móde qaitadan elshi attandyrady:
— Bizdiń shekaramyzda eshkimge qajetsiz jer jatyr. Ǵundar, bul senderge múldem kereksiz. Bizge sol jerdi berińder.
Móde bul joly da keńesshilerin jiyp, olardan ne isteimin dep aqyl surady. Keibireýler onyń suraǵyna bylai dep jaýap qatty:
— Bul bos jatqan jerdi berýge de bolady, bermeýge de bolady. Odan báribir eshqandai paida joq.
Osy arada Módeniń tózimi sarqyldy:
— Men ámirshiniń eki talabyn oryndadym, sebebi, at ta, áiel de ózimdiki bolatyn. Al, jer jaqsy bolsa da, jaman bolsa da halyqtiki! Biz ony basqalarǵa qalaisha syiǵa tartpaqpyz?
Ol jerdi jatqa berý kerek degenderdi darǵa asýǵa buiyryp, ózi qol bastap, jaýǵa qarsy joryqqa attanady.
Osy ýaqyttarda ǵundar men Dýn Hý eli arasynda soǵys bastalady. Bul soǵysta Móde jaý áskerin tas-talqan etip, olardy kóp shyǵynǵa ushyratty.
Móde quryp, keńeitip, qorǵaǵan memleket týra 350 jyl ómir súrdi. Eger buǵan Ejelgi Qytai aýmaǵyndaǵy ǵundar yqpapynda bolǵan ulystardyń taǵy birneshe júzdegen jyl tirshilik etkenin qosar bolsaq, Móde negizdegen memlekettiń jalpy tarihy 650 jyldy quraidy.
Ult portaly
