عۇنداردىڭ كەڭ بايتاق جەرٸنە دۋن حۋ مەملەكەتٸنٸڭ حانى قىزىعىپ, ونى الۋدىڭ امالىن ويلاستىردى. دۋن حۋ ەلٸنٸڭ ەمٸرشٸسٸ عۇنداردىڭ جاس پاتشاسىنا ەلشٸسٸن جٸبەرٸپ:
— مٶدە دوستىعىمىزدى سىيلاسا, ماعان سەيگٷلٸگٸن بەرسٸن, — دەيدٸ.
سٶيتٸپ كٷنٸنە ايشىلىق جولداردى الاتىن جٷيرٸك تۇلپارىن سۇراتادى.
مٶدە ەلدٸڭ ەڭ اتاقتى دا اقىلدى ادامدارىن جيناپ, نە ٸستەيتٸنٸ جٶنٸندە كەڭەس قۇرادى. كەڭەسشٸلەر وعان بىلاي دەيدٸ:
— ايشىلىق جولدى بٸر كٷندە الاتىن ارعىماق — عۇنداردىڭ كيەسٸ, سوندىقتان, بۇل اتتى بەرۋگە بولمايدى. ولاردىڭ مۇنىسىنا مٶدە بىلاي دەپ جاۋاپ قايىرادى:
— شىنىمەن-اق بٸز بٸر اتقا بولا سوعىسپاقشىمىز با? بۇل سىيىمىز ودان دا بٸزدٸڭ كٶرشٸلەرمەن دوستىعىمىزدىڭ كەپٸلٸ بولسىن. سٶيتٸپ مٶدە جٷيرٸك تۇلپاردى سىيعا تارتادى.
دۋن حۋ ەلٸنٸڭ ۇلىقتارى مٶدەگە تاعى دا جاۋشى جٸبەرٸپ, ٶز ەمٸرشٸلەرٸنە ٶزٸنٸڭ ەڭ سۇلۋ دا سٷيٸكتٸ ەيەلدەرٸنٸڭ بٸرٸن تارتۋ ەتۋٸن سۇرادى. بۇل ۇلى ەمٸرشٸنٸڭ نامىسىنا تيٸپ, سوعىستىڭ سەبەبٸ بولۋعا تيٸستٸ ەدٸ. مٶدە تاعى دا ٶزٸنٸڭ ەڭ اقىلگٶي دەگەن ۋەزٸرلەرٸن كەڭەسكە جينايدى. ٶتٸنٸشكە ٶتتەرٸ جارىلارداي اشۋلانعان كەڭەسشٸلەر ايتتى:
— بۇل كٶرشٸلەرٸمٸز ەبدەن استامسىدى. ەندٸ ەيەلٸمٸزدٸ سۇراپ وتىر. بٸز ولارمەن سوعىسۋىمىز كەرەك!
ولاردى تىڭداپ بولعان سوڭ, مٶدە بىلاي دەپ ۇيعاردى:
— ارعىماق تا, ەيەل دە — ەل تىنىشتىعىنىڭ كەپٸلٸ بولسىن.
سٶيتٸپ ەمٸرشٸگە ەيەلٸن دە اتتاندىردى…
ەندٸ مەيماناسى تاسىعان ەمٸرشٸ ەسكەرٸن جيىپ, باتىسقا, دەل عۇنداردىڭ شەكاراسىنا جىلجىپ كەلدٸ.
عۇن ورداسى مەن دۋن حۋ ەلٸنٸڭ ارالىعىندا شٶپ تە ٶسپەيتٸن, سۋى دا جوق بٸر پۇشپاق جەر جاتقان بولاتىن. كٶپ زامانداردان بەرٸ بۇل جەردە ەشكٸم مەكەن ەتپەگەن, شەكارا دەل وسى ارادان ٶتەدٸ. ەمٸرشٸ مٶدە قايتادان ەلشٸ اتتاندىرادى:
— بٸزدٸڭ شەكارامىزدا ەشكٸمگە قاجەتسٸز جەر جاتىر. عۇندار, بۇل سەندەرگە مٷلدەم كەرەكسٸز. بٸزگە سول جەردٸ بەرٸڭدەر.
مٶدە بۇل جولى دا كەڭەسشٸلەرٸن جيىپ, ولاردان نە ٸستەيمٸن دەپ اقىل سۇرادى. كەيبٸرەۋلەر ونىڭ سۇراعىنا بىلاي دەپ جاۋاپ قاتتى:
— بۇل بوس جاتقان جەردٸ بەرۋگە دە بولادى, بەرمەۋگە دە بولادى. ودان بەرٸبٸر ەشقانداي پايدا جوق.
وسى ارادا مٶدەنٸڭ تٶزٸمٸ سارقىلدى:
— مەن ەمٸرشٸنٸڭ ەكٸ تالابىن ورىندادىم, سەبەبٸ, ات تا, ەيەل دە ٶزٸمدٸكٸ بولاتىن. ال, جەر جاقسى بولسا دا, جامان بولسا دا حالىقتٸكٸ! بٸز ونى باسقالارعا قالايشا سىيعا تارتپاقپىز?
ول جەردٸ جاتقا بەرۋ كەرەك دەگەندەردٸ دارعا اسۋعا بۇيىرىپ, ٶزٸ قول باستاپ, جاۋعا قارسى جورىققا اتتانادى.
وسى ۋاقىتتاردا عۇندار مەن دۋن حۋ ەلٸ اراسىندا سوعىس باستالادى. بۇل سوعىستا مٶدە جاۋ ەسكەرٸن تاس-تالقان ەتٸپ, ولاردى كٶپ شىعىنعا ۇشىراتتى.
مٶدە قۇرىپ, كەڭەيتٸپ, قورعاعان مەملەكەت تۋرا 350 جىل ٶمٸر سٷردٸ. ەگەر بۇعان ەجەلگٸ قىتاي اۋماعىنداعى عۇندار ىقپاپىندا بولعان ۇلىستاردىڭ تاعى بٸرنەشە جٷزدەگەن جىل تٸرشٸلٸك ەتكەنٸن قوسار بولساق, مٶدە نەگٸزدەگەن مەملەكەتتٸڭ جالپى تاريحى 650 جىلدى قۇرايدى.
ۇلت پورتالى
