Gúlshara Ábdiqalyqovanyń tóraǵalyǵymen Jastar saiasaty jónindegi keńestiń otyrysy ótti

Qazaqstan Respýblikasynyń Memlekettik hatshysy Gúlshara Ábdiqalyqovanyń tóraǵalyǵymen Qazaqstan Respýblikasynyń Prezidenti janyndaǵy Jastar saiasaty jónindegi keńestiń otyrysy ótti, dep habarlaidy "Ult aqparat" Aqordaǵa silteme jasap.

Otyrysty ashqan G.Ábdiqalyqova Memleket basshysy Nursultan Nazarbaevtyń «Uly dalanyń jeti qyry» atty baǵdarlamalyq maqalasyndaǵy «Ótkenin maqtan tutyp, búginin naqty baǵalai bilý jáne bolashaqqa oń kózqaras tanytý – elimizdiń tabysty bolýynyń kepili degenimiz osy» degen sózine toqtaldy.

– Bul basymdyqtar 2019 jyly Jastar jylyn ótkizýdiń negizine ainalýǵa tiis, – dedi Memlekettik hatshy.

Jiynda Qoǵamdyq damý ministrliginiń «Qazaqstan 2020: bolashaqqa jol» Qazaqstan Respýblikasynyń memlekettik jastar saiasatynyń 2020 jylǵa deiingi tujyrymdamasynyń júzege asyrylý barysy jónindegi málimeti tyńdaldy. 2018 jylǵy qyrkúiekte 18-29 jas aralyǵyndaǵy NEET jastaryn, sonyń ishinde 2018 jylǵy túlekterdi jumyspen qamtý jáne áleýmettendirý jónindegi jol kartasy bekitildi. Qazaqstanda 2018 jylǵy ekinshi toqsanda NEET sanatyndaǵy jastar 7,7 paiyz (byltyrǵy sáikes kezeńde 8,5 paiyz) bolǵan. «Barshaǵa tegin kásiptik-tehnikalyq bilim berý» jobasy aiasynda 312 kolledjde 381 mamandyq boiynsha 21 myń adam bilim alýda.

Sonymen qatar, Ishki ister jáne Densaýlyq saqtaý ministrlikteriniń jastar arasyndaǵy quqyq buzýshylyq pen sýitsidtiń aldyn alý jónindegi málimeti tyńdaldy. Sońǵy 5 jyl ishinde jastar arasyndaǵy qylmys sany (14-29 jas aralyǵy) 5 paiyzǵa azaiǵan. Elimizdiń joǵary oqý oryndaryndaǵy jáne stýdentter jataqhanasyndaǵy tártipti qamtamasyz etý barysynda politsiiaǵa járdemdesetin 196 stýdenttik jasaq qyzmet atqarady. Olar biyl 180 qylmysty áshkerelep, 5,4 myńnan astam ákimshilik quqyq buzý jaittaryn anyqtady. 2017 jyly 15-17 jas mólsherindegi jastardyń sýitsid kórsetkishi 36,6 paiyzǵa, óz-ózine qol salý áreketi 43,4 paiyzǵa azaiǵany baiqalǵan.

Keńes otyrysynda 2019 jylǵa arnalǵan jumys jospary qaraldy.

Sońynda Qazaqstan Respýblikasynyń Memlekettik hatshysy Gúlshara Ábdiqalyqova memlekettik organdarǵa birqatar naqty tapsyrma berdi.