Qyzylorda oblysy epidemiologiialyq jaǵdaidy baǵalaý matritsasyna sáikes 21 sáýirden bastap «sarydan» «qyzyl aimaqqa» aýysty. Osyǵan bailanysty aimaq basshysy Gúlshara Ábdiqalyqova turǵyndarǵa úndeý jasady, dep habarlaidy "Ult aqparat".
«Búgin oblysymyz «qyzyl aimaqqa» endi. Bul qýanatyn jaǵdai emes. Pandemiia bastalǵannan bergi ýaqytta óńirde 4890 jaǵdai tirkelgen. Álemdi dúrliktirgen indettiń beti qaitar túri joq. Sońǵy ýaqytta virýs juqtyrǵandardyń sany tym kóbeiip barady.
«Qamysty bos ustasań, qolyńdy kesedi» deidi dana halqymyz. Saqtyq sharalaryna mán berýdi umytsaq, qózge kórinbeitin tajaldyń kez kelgen sátte qater tóndireri anyq. Ony tek saqtaný arqyly ǵana jeńe alamyz», - dedi oblys ákimi.
Oblys ákimi osy rette jergilikti mekemelerdiń, halyqqa qyzmet kórsetý oryndarynyń basshylary virýs tez taraityn adamdar tyǵyz jinalatyn oryndarda, ǵimarattarda halyqtyń sapyrylysyn rettegeni jón ekenin atap ótti.
«Densaýlyq aldymen ózimizge kerek. Sondyqtan, árbir adam ózine ǵana emes, otbasyna, týǵan-týysyna, ainalasyndaǵy adamdarǵa ziianyn tigizbeýi tiis. Toi-tomalaq, as berý, basqa da kópshilik jiyndardy jaqsy kúnderge qaldyra turaiyq. Densaýlyǵymyz bárinen qymbat ekenin umytpaǵanymyz jón. Qarapaiym qaǵidatty eskereiik: maska, antiseptik jáne ara qashyqtyqty saqtaý.
Qaýipti indettiń uzaqqa sozylmasy úshin osy qaǵidattardy eskerip, óz densaýlyqtaryńyzǵa asqan jaýapkershilikpen qarap, karantin talabyna baǵynýǵa shaqyramyn», - delingen oblys ákiminiń úndeýinde.
