Foto: grabliki.ru
Bul osydan birneshe ǵasyr buryn bolǵan oqiǵa edi. Resei imperiiasynyń biligin ákeden balaǵa, baladan nemerege aýysyp, úsh ǵasyr ustaǵan Romanovtar tuqymy osy oqiǵaǵa bailanysty úlken toi jasaidy. Bul ulan-asyr toiǵa dúniejúziniń kóptegen memleket basshylary shaqyrylyp, merekeniń sánin keltirgen. Sondai bir shaqyrylǵan qonaq Prýssiia men Germaniiany kezinde biriktirgen temirdei Bismark eken. Birer kún basqalarmen birge kóńil kóterip, sharshańqyraǵan kantsler qasyna ózimen birge kelgen dos-jarandaryn alyp, imperatordyń birneshe gektarǵa sozylǵan baý-baǵyn atqa minip aralap ketedi.Baqta qanshama aǵashtyń túri, túrli shóptiń hosh iisi adamǵa sezim berip, sergitkendei bolady.
Ormandy aralap kele jatqan Bismark bir jerden kúzette turǵan eki áskerdi baiqaidy. Qastarynan ótip bara jatyp, orman ortasynda neni kúzetip turǵandaryn suraidy.
Olar neni kúzetetinin bilmeitin bolyp shyǵady. Tek kúnde kúzet aýysyp turatynyn aitady. Buǵan qairan qalǵan kantsler, serýennen qaityp kelgen soń, 2-shi Nikolaidan orman arasyndaǵy kúzettiń ne úshin qoiylǵanyn suraidy. Ol da eshteńe bilmeitin bolyp shyǵady. Aqyry, saraidaǵylar surastyra kelip, jaýabyn tapqandai bolady.
Osydan úsh ǵasyr buryn 2-shi Ekaterina kóktem kúni baqty aralap júrip, bir jerden jaýqazyndardyń ósip, gúl atyp turǵanyn baiqaidy. Saraidaǵy dvoriandardyń balalary úzip tastamas úshin kúzet aldyryp, baqylatyp qoiǵan bolyp shyǵady. Sodan keiin ol qoidyrǵan kúzetin umytyp ketken ǵoi! 1 jyl, 5 jyl, 10 jyl, 30 jyl, 100 jyl, 300 jyl! Qanshama býyn ótti. Kúndelikti bul jerge keletin kúzet neni kúzetetinin de umytqan. Áiteýir, osy araǵa kúzet turýy tiis. Masqara bolǵanda, eger Bismark bolmaǵanda bul jalǵasa berer me edi?!
