Grýziia úkimeti Ýkrainanyń Mihail Saakashvilige qyzmet usynýyna narazylyq bildirip, bul eki eldiń qarym-qatynasyna keri áser etýi múmkin dep málimdedi.
Grýziianyń premer-ministri Georgii Gahariia 24 sáýirde týǵan jerinde "bilik ókiletin asyra paidalandy" dep aiyptalyp, izdeý jariialanǵan adamǵa Ýkrainanyń joǵary qyzmet usynýy "aqylǵa qonbaityn áreket" dedi.
Al Grýziianyń burynǵy prezidenti, Odessa oblysynyń burynǵy basshysy Mihail Saakashvili Ýkraina premer-ministriniń reforma jónindegi orynbasary bolýǵa kelisti. Bul týraly ýkrainalyq "Slýga naroda" partiiasy ókilderimen kezdesý kezinde Saakashvilidiń ózi aitty.
Saakashvilidiń sózine qaraǵanda, ol ózge máselelermen qatar Halyqaralyq valiýta qorymen bailanys máselesine jaýapty bolady. Grýziianyń burynǵy prezidenti el ekonomikalyq daǵdarysqa ushyraǵan kezde úkimetpen jumysty nyǵaitýǵa kúsh salatynyn aitty.
"Ýkraina ekonomikasyn qutqaryp qana qoimai, árbir otbasyna daǵdarystyń yqpalyn azaitý úshin erekshe qadamdar jasaýǵa týra keledi" dedi Saakashvili jýrnalisterge. Ol Radada óziniń baǵdarlamasyn tanystyrýǵa ýáde berdi.
Saakashvilidiń kandidatýrasyn Ýkraina parlamenti maquldaýy tiis. Daýys berý aidyń sońyna deiin ótýi múmkin. "Slýga naroda" partiiasynyń ókilderi bul másele boiynsha fraktsiiada ázirge ortaq sheshim joq ekenin aitty.
Diplomattar sózine súiengen aqparat quraldarynyń jazýynsha, Grýziia Ýkrainadaǵy elshisi Teimýraz Sharashenidzeni elge qaitarǵan.
22 sáýirde Ýkraina prezidenti Vladimir Zelenskiidiń Mihail Saakashvilige vitse-premer qyzmetin usynǵany týraly belgili bolǵan edi.
2015 jyly Saakashvili Ýkraina azamattyǵyn alyp, sol kezdegi prezident Petr Poroshenkonyń jarlyǵymen Odessa oblysynyń basshylyǵyna taǵaiyndalǵan bolatyn. Osydan keiin Grýziia «qos azamattyqqa jol berilmeidi» degen ýájben Saakashvilidi Grýziia azamattyǵynan aiyrdy.
Poroshenko pen Saakashvili qatynasy 2016 jyly jemqorlyqpen kúres jáne reforma jasaý týraly bastamalardan keiin buzylyp, qarasha aiynda Saakashvili qyzmetinen bosatyldy. 2017 jyly shilde aiynda Saakashvili «Jańa kúshter rýhy» (ýkrain tilinde: Rýh novih sil – red.) dep atalatyn oppozitsiialyq partiia qurǵan soń Poroshenkonyń jarlyǵymen Ýkraina azamattyǵynan aiyrylǵan.
Byltyr mamyr aiynda Ýkrainanyń jańa prezidenti Vladimir Zelenskii Saakashvilige Ýkraina azamattyǵyn qaitaryp bergen.
