Grýziia biligi elde zańdy túrde turý quqyǵyn alý úshin jasalatyn jalǵan nekemen kúresti kúsheitýdi josparlap otyr. Osy maqsatta Ishki ister ministrligi zańnamaǵa birqatar qatań túzetýler engizýdi usynyp, tiisti qujattardy parlament qaraýyna joldady, dep habarlaidy ult.kz.
Usynylǵan ózgeristerge sáikes, Grýziia azamaty men sheteldik azamat arasyndaǵy jalǵan neke qylmystyq quqyq buzýshylyq retinde qarastyrylmaq.
Eger zań jobasy qabyldansa, turýǵa yqtiiarhat alý maqsatynda jasalǵan jalǵan neke úshin aiyppul salý, bir jyldan eki jylǵa deiingi merzimge úiqamaqqa alý nemese eki jylǵa deiin bas bostandyǵynan aiyrý jazasy qarastyrylady.
Al sheteldik azamattar úshin jaza odan da qatań bolýy múmkin. Sottalǵannan keiin olar el aýmaǵynan shyǵarylyp, Grýziiaǵa qaita kirýge 2 jyldan 10 jylǵa deiin tyiym salynýy yqtimal.
Grýziianyń Ishki ister ministrligi jańa normalardyń kóshi-qon aǵyndaryn baqylaýdy kúsheitýge jáne zańnamadaǵy olqylyqtardy joiýǵa baǵyttalǵanyn málimdedi. Sondai-aq kóshi-qon qyzmetiniń ókilettikterin keńeitip, halyqaralyq otbasylardyń shynaiy otbasylyq ómir súrip jatqanyn tekserý múmkindigin arttyrý kózdelip otyr.
Aita keteiik, sońǵy jyldary Grýziia shetel azamattaryna qatysty kóshi-qon talaptaryn kezeń-kezeńimen kúsheitip keledi. Buǵan deiin elde investorlarǵa arnalǵan immigratsiialyq vizalardy alý sharttary qatańdatylyp, qashyqtan jumys isteitin azamattarǵa jańa talaptar engizilgen bolatyn. Sonymen qatar sheteldikterge gid, kýrer jáne taksi júrgizýshisi bolyp jumys isteýge shekteý qoiylǵan.
Qazirgi ýaqytta zań jobasy depýtattardyń qaraýynda. Qujat jaqyn arada qabyldanýy múmkin.
