Almaty taýlarynda serýendep júrgen týrister kútpegen jerden qar barysyn kórip qaldy. Jabaiy ań olarǵa birneshe metr qashyqtyqta jaqyndaǵan, dep habarlaidy ult.kz.
Oqiǵa týraly Instagram qoldanýshysy jazdy. Onyń aitýynsha, ol Viktoriia esimdi serigimen birge taýdaǵy soqpaqpen kele jatqanda, olarǵa jergilikti it erip júrgen.
It keide alǵa júgirip ketip, keiin týristerdi kútip, qaita qosylyp otyrǵan. Alaida aialdamalardyń birinde ol alǵa qarai ketip, mazasyzdanyp úre bastaǵan.
«Jaqyndasaq, júni tikireiip, bir núktege qarap tur eken. Al alda eshteńe kórinbeidi: kún kóz qaryqtyrady, butalar men shyrshalar bar. Kenet it ornynan atyp turdy. Birneshe sekýndtan keiin ol bizge qarai qaita júgirdi, al onyń artynan qar barysy kele jatty», – dep jazdy týrist.
Onyń sózinshe, qar barysy týristerdi kórgen kezde toqtap, birneshe sekýnd boiy olarǵa qyzyǵýshylyqpen qarap turǵan. Keiin shyrshanyń artyna kirip, kózden ǵaiyp bolǵan.
Týrister keiin qar barysyn soqpaqtyń joǵary jaǵynan taǵy bir ret kórgen. Olardyń boljamynsha, jabaiy ańnyń mańaiynda ózi aýlaǵan oljasy bolǵan jáne ony qorǵap júrgen bolýy múmkin.
Oqiǵa kezinde týristerge taýda kezdesken basqa adamdar da kómektesken. Olar erip júrgen itti ózderimen birge alyp, eldi mekenge túsirip jibergen. Al týrister saparyn jalǵastyrǵan.
