Aqtóbe oblysynyń turǵynynyń aitýynsha, onyń uly, 2002 jyly týǵan Rashid Talǵatuly Qadyrov eki jyl buryn eshkimge eskertpesten úiden ketip qalǵan, dep habarlaidy ult.kz.
«Men alty balanyń anasymyn, “Kúmis alqa” iegerimin. Rashid – ortanshy ulym. Bir kúni zattaryn jinap, eshteńe aitpai ketip qaldy. Keiin onyń Túrkiiaǵa jumysqa ushyp ketkenin estidim. Bul men úshin úlken soqqy boldy. Ádette balalarym jolǵa shyǵarda mindetti túrde batamdy alady. Al bul joly ol ún-túnsiz joǵalyp ketti. Uzaq ýaqyt boiy odan eshqandai habar bolmady», – deidi anasy.
Arada biraz ýaqyt ótken soń Rashid beitanys nómirden habarlasyp, óziniń Grekiia túrmesinde otyrǵanyn aitqan.
Onyń sózinshe, Instagram jelisinen jumys týraly habarlandyrý kórip, usynysqa kelisken. Jolaqysyn uiymdastyrýshylar tólep, týristerdi motorly qaiyqpen serýendetetin jumys usynamyz degen. Alaida keiin bul usynystyń zańsyz migranttardy tasymaldaýǵa qatysty ekeni belgili bolǵan. Jas jigit óziniń qandai iske aralasyp ketkenin túsinbegenin aitqan.
Anasynyń málimetinshe, uly shet tilin bilmeidi jáne tergeý kezinde oǵan aýdarmashy berilmegen. Sondai-aq qujattarǵa qol qoimasa, jaza merzimi odan da uzaratyny aitylǵan.
Nátijesinde Grekiia soty Rashid Qadyrovty 125 jylǵa bas bostandyǵynan aiyryp, shamamen 1 milliard teńgege jýyq aiyppul salǵan.
«Ulym óte jas, tek aqsha taýyp, otbasyna kómekteskisi keldi. Biraq alaiaqtardyń arbaýyna túsip qaldy. Ol zańsyz migranttardy tasymaldaýdy uiymdastyrǵan adam emes dep esepteimin. Syrtqy ister ministrliginen osy isti jan-jaqty qarap, ulymdy elge qaitarýǵa kómektesýdi suraimyn», – dedi Nurhan Qadyrova.
