Foto: uiymdastyrýshylardan
Jambyl oblysynda jastardyń kitapqa degen qyzyǵýshylyǵyn arttyryp, intellektýaldy áleýetin kóterýge baǵyttalǵan «Áýlieata — kitap oqityn óńir» jobasy qarqyndy damyp keledi. Sonyń eń jarqyn bastamalarynyń biri – biyl alǵash ret uiymdastyrylǵan «Oi sheberi» ziiatkerlik oiyny, dep habarlaidy Ult.kz.
Shara Jambyl oblystyq «Móldir bulaq» oqý-saýyqtyrý ortalyǵynda ótti jáne myńdaǵan jasqa jańa múmkindik syilady.
Bul joba óńirdiń mádeni-rýhani ómirinde erekshe oryn alýda. Onyń basty maqsaty – intellektýaldy ortany qalyptastyrý, jastardyń kitapqa degen qyzyǵýshylyǵyn kúsheitý, oi-órisin keńeitý jáne shyǵarmashylyq áleýetin damytý. «Áýlieata — kitap oqityn óńir» aiasynda osy ýaqytqa deiin «Oqýshylar ligasy», «Daryndy mektepter ligasy» jáne «Tehnikalyq jáne kásiptik bilim berý uiymdary ligasy» boiynsha 15 oiyn ótkizilip, 400 komanda, shamamen 2000 kitap qamtyldy. Bul kórsetkish jastardyń bilimge degen qushtarlyǵy artyp kele jatqanyn kórsetedi.
Ziiatkerlik saiys erekshe formatymen de kózge tústi. Qatysýshylarǵa ártúrli taqyryptardy qamtityn suraqtar, logikalyq tapsyrmalar jáne tanymdyq saýaldar usynyldy. Barlyq oiyndar ádil ári ashyq ótti. Jastar bilimin synap qana qoimai, jańa tájiribe jinaqtap, logikalyq oilaý qabiletin damytty. Saiys barysynda dostyq pen seriktestik ahýaly erekshe sezildi. Bul oiyndar jastar arasyndaǵy mádeni jáne rýhani bailanystardy nyǵaityp, olardy bir-birimen jaqyndata tústi.
«Oi sheberi» oiyny ýaqyt óte mazmunyn keńeitip, jańa ádistemelik baǵyttarmen tolyqtyrylýda. Qarapaiym bilim jarysy ǵana emes, jas býynnyń kreativti oilaý qabiletin jetildiretin alańǵa ainaldy. Joba kitap oqý mádenietin dáripteýde jáne bilimge qushtar jastardyń qataryn kóbeitýge baǵyttalǵan.
Oiyndar úsh túrli liga boiynsha uiymdastyryldy.
Oqýshylar ligasy – jalpy orta bilim berý uiymdarynyń oqýshylary úshin ótkizildi. Jyl boiy ótken 11 oiynda júzdegen komanda baq synap, tek úzdikter ǵana grand finalǵa joldama aldy. Bastapqyda 350-den astam komanda jarysqa qatysyp, finalǵa eń myqty 11 top qana shyqty. Olar 2 million teńgelik júlde qoryna talasý úshin kúresti. Grand finalǵa qatysýshylarǵa aldyn ala 20 túrli kitap usynylyp, solar boiynsha suraqtar daiyndaldy.
Finalda baq synaǵan komandalar qatarynda:
- Merki aýdanynan – Sypatai Álibekuly atyndaǵy №19 orta mektebi;
- Turar Rysqulov aýdanynan – Qulan tirek mektep-gimnaziiasy;
- Moiynqum aýdanynan – Shyǵanaq orta mektebi;
- Sarysý aýdanynan – Muhtar Áýezov atyndaǵy mektep-gimnaziiasy;
- Jambyl aýdanynan – Muhtar Áýezov atyndaǵy orta mektebi;
- Talas aýdanynan – Ahmet Baitursynuly atyndaǵy gimnaziia;
- Jýaly aýdanynan – Álihan Bókeihan atyndaǵy №15 tirek mektep-litseii;
- Baizaq aýdanynan – Nyǵmetýlla Kiikbaev atyndaǵy mektep-gimnaziiasy;
- Shý aýdanynan – Abai atyndaǵy orta mektebi;
- Taraz qalasynan – №15 mektep-gimnaziiasy jáne №23 orta mektebi.
Aita keterligi, finalda eki Muhtar Áýezov atyndaǵy mektep jáne eki №15 mektep kezdesti – bul da bilim dodasyndaǵy qyzyqty sátterdiń biri boldy.
Foto: uiymdastyrýshylardan
Daryndy mektepter ligasy da erekshe tartysty ótti. Bul baǵytqa oblystyń mamandandyrylǵan mektepterinen 20 komanda ótinish berip, olardyń ishinen úzdik 11 top aqtyq synǵa jetti. Qatysýshylardyń árqaisysy 16 kitap oqyp daiyndaldy. Júlde qory – 1,2 mln teńge boldy. Úsh kezeńniń nátijesi qosylyp, jeńimpazdar anyqtaldy:
- 3 oryn – Abai atyndaǵy daryndy balalarǵa arnalǵan qazaq tili men ádebietin tereńdete oqytatyn mektep-gimnaziiasynyń «Tastúiin» toby (300 000 tg)
- 2 oryn – «Daryn» litsei-internatynyń «Samuryq» toby (400 000 tg)
- 1 oryn – «Bilim-innovatsiia» litsei-internatynyń «Rýhaniiat» toby (500 000 tg jáne «Oi sheberi» kýbogy).
Jeńimpazdardy Jambyl oblysy ákimdiginiń bilim basqarmasy janyndaǵy «Jambyl daryny» ortalyǵynyń direktory Maira Esenalieva marapattady.
Tehnikalyq jáne kásiptik bilim berý uiymdary ligasy da biyl jastardyń belsendi qatysýymen ótti. Bul ligaǵa 25 komanda qatysyp, ishinen úzdik 13 top finalǵa jetti. Júlde qory – 1,2 mln teńge. Qatysýshylar 15 kitap oqyp daiyndaldy. Qorytyndysynda:
- 3 oryn – Qordai aýdanynyń «Bereke» kolledjiniń toby (300 000 tg)
- 2 oryn – Jambyl meditsinalyq joǵary kolledji (400 000 tg)
- 1 oryn – Abai atyndaǵy Jambyl gýmanitarlyq joǵary kolledji (500 000 tg jáne «Oi sheberi» kýbogy).
Finaldyq básekeniń taǵy bir jańalyǵy – suraqtardy ázirleýde jasandy intellekt qoldanylýy. Bul oiynǵa jańa tehnologiialyq sipat berip, qatysýshylarǵa jańa tájiribe syilady. Sonymen birge sharaǵa «Jambyl damý» qory, «Jambyl Taraz» gazeti jáne «Áýlieata TransPass» kompaniiasy demeýshilik kórsetti.
Grand final qorytyndysy da erekshe tartysty boldy. Úsh komanda teń upai jinap, sheshýshi sátte komandalardyń jetekshileri blits-saýaldarǵa jaýap berip, júldeli oryndar sol arqyly anyqtaldy:
- 3 oryn – Álihan Bókeihan atyndaǵy №15 tirek mektep-litseii (Jýaly aýdany) – LENOVO noýtbýgi (5 dana)
- 2 oryn – Qulan tirek mektep-gimnaziiasy (Turar Rysqulov aýdany) – iPad plansheti (5 dana)
- 1 oryn – Nyǵmetýlla Kiikbaev atyndaǵy mektep-gimnaziiasy (Baizaq aýdany) – MacBook noýtbýgi (5 dana) jáne altyn medal.
Júldegerlerdi marapattaý rásimine Jambyl oblysy ákiminiń birinshi orynbasary Nurjan Kalenderov pen oblystyq bilim basqarmasy basshysynyń orynbasary Lázzat Qyzylqulova qatysty.
Kópshilikti qyzyqtyrǵan suraq – «Bul joba kelesi maýsymda jalǵasa ma?» boldy. Uiymdastyrýshylar bul bastama oblys ákimi men bilim basqarmasynyń qoldaýymen jalǵasatynyn qýana jetkizdi.
«Oi sheberi» – jas býyndy kitapqa baýlý, bilimge yntalandyrý jáne intellektýaldy qoǵam qalyptastyrý jolyndaǵy mańyzdy bastamaǵa ainaldy. Qatysýshylardyń qýanyshy, jastardyń qyzyǵýshylyǵy men demeýshilerdiń qoldaýy jobanyń bolashaǵy zor ekenin kórsetti.
