Graffiti jazbalar arqyly esirtkini nasihattaityn jáne jarnamalaýshy kúdiktiler ustaldy, – dep habarlaidy QR Ishki ister ministrliginiń baspasóz qyzmeti.
Baspasóz qyzmetiniń málimetterine qaraǵanda, esirtki qylmysy úshin jaýapkershilikti qatańdatatyn qylmystyq zańnamaǵa engizilgen túzetýler kúshine engennen keiingi alǵashqy aptada esirtkini jarnamalaý men nasihattaý úshin jaýapkershilik belgileitin Qylmystyq kodekstiń jańa baby boiynsha eki qylmystyq is qozǵaldy.
15 qańtarda Qaraǵandyda politsiia qyzmetkerleri esirtki taratatyn, internet-resýrstar kórsetilgen habarlandyrýlar jabystyryp júrgen qalanyń eki turǵynyn ustady. Ustalǵandardyń ekeýi de narkologiialyq esepte turady, qylmystyq, onyń ishinde esirtki ótkizgeni úshin de jaýapqa tartylǵan.
17 qańtarda Almatyda esirtki pritonyn tintý barysynda tanymal messendjerdegi topqa internet silteme jasalǵan graffiti-jazbasy úshin qoldanylatyn trafaret alyndy. Priton qatysýshysy ustalyp, onyń qolynan esirtki taratatyn áleýmettik jelidegi topqa silteme kórsetilgen paraqshalar alyndy.
Daktiloskopiialyq, sot-biologiialyq jáne narkologiialyq saraptamalar taǵaiyndaldy. Oqiǵa ornynan uialy telefondar alyndy. Olardaǵy aqparat osyndai jarnamanyń «tapsyrýshylarymen» ózara bailanystaryn anyqtaýǵa múmkindik beredi.
Ishki ister ministrligi 11 qańtardan bastap esirtkini nasihattaityn jáne satatyn internet-saittardyń siltemelerin taratqany úshin qylmystyq jaýapkershilik belgilengenin esterińizge salady. Qylmystyq Kodekske esirtkini nasihattaý nemese zańsyz jarnamalaý úshin qylmystyq jaýapkershilik belgileitin jańa 299-1-bap engizildi. Ol boiynsha úsh jylǵa deiin bas bostandyǵynan aiyrý túrindegi jaza kózdelgen.
«Eger osy qylmys toppen, birneshe ret, bilim uiymdarynda nemese adam kóp jinalatyn oryndarda, buqaralyq aqparat quraldary nemese elektrondyq aqparat resýrstaryn paidalanyp, qyzmetik jaǵdaiyn paidalanyp jasalsa 3 jyldan 6 jylǵa deiin bas bostandyǵynan aiyrý túrindegi jaza belgilenedi»,-delingen QR IIM baspasóz qyzmeti taratqan habarlamada.
