Gonkongte pandemiia bastalǵaly alǵashqy lokdaýn engizildi. Biraq ol búkil qalaǵa qatysty emes, tek halyq tyǵyzdyǵy erekshe joǵary jáne kedei toptar ómir súretin keibir aýdandaryna qatysty, dep habarlaidy VVS.
Djordan aýdanynda kópqabatty úilerde turatyn shamamen 10 myńǵa jýyq adamǵa úiden shyqpaýǵa nusqaý berildi. Aýdannyń barlyq turǵyny testileýden ótpeiinshe, olar úiden shyqpaýy kerek.
Bilik oǵan 48 saǵat ketetinin aitty. Osy ýaqyt aralyǵynda 150 kópqabatty úidiń turǵyndary tekseriledi.
Gonkong Qytaidyń ortalyq aýdandarynan jańa koronavirýs «ákelingen» alǵashqy oryndardyń birine ainaldy.
Biraq bilik qatań lokdaýn engizbei-aq shekteý sharalary men aiyppul júieleriniń kómegimen jaǵdaidy baqylaýda ustady. Munda aýrýǵa shaldyqqandardyń jalpy sany 10 myńnan aspaidy. Koronavirýstan bar-joǵy 170 adam kóz jumǵan.
Alaida sońǵy eki aida qalada Djordan aýdanyna taraǵan epidemiianyń tórtinshi tolqyny bastaldy. Munda qańtardyń alǵashqy 20 kúninde koronavirýs juqtyrýdyń 162 jaǵdaiy anyqtalǵan.
