2020 jylǵy 15 qańtarda Gonkongtyń aýdandyq sotynda Ábilqaiyr Nýkpidi kepildikpen bosatý qarastyrylǵan úshinshi sot otyrysy ótti. Bul jaiynda QR Syrtqy ister ministrliginiń Telegram paraqshasynda aitylǵan, dep habarlaidy "Ult aqparat".
Vedomstvo málimetinshe, Á.Nýkpidiń múddesin Baptistik ýniversitet usynǵan advokat qorǵap júr.
Qorǵaýshy taraptyń dálelderin nazarǵa ala otyryp, sot Á.Nýkpidi kepildikke bosatý týraly sheshim qabyldaǵan. Sot sheshimine sáikes, Á.Nýkpi 2020 jylǵy 26 aqpanǵa belgilengen kelesi sot otyrysyna deiin anasymen birge Baptistik ýniversitettiń kampýsynda bolyp, bekitilgen komendanttyq saǵatty saqtaýǵa mindetti.
«QR Gonkongtaǵy Bas konsýldyǵy Á.Nýkpidiń anasyna tolyq qoldaý kórsetip, advokattarmen kelissóz júrgizýine, sot otyrystaryna qatysýyna jáne basqa da qajetti konsýldyq-quqyqtyq máselelerine kómektesýde» dep atap ótedi ministrlikten.
Eske sala keteiik, ótken jyldyń 18 qarashasynda Gonkong qalasynda narazylar men politsiia arasyndaǵy qaqtyǵys kezinde Qazaqstan azamaty ustaldy.
Osy jaitqa bailanysty pikir bildirgen QR Syrtqy ister ministrliginiń resmi ókili Aibek Smadiiarov qazaq stýdentiniń soty 2020 jyldyń qańtarynda ótetinin habarlady.
«Sotyn kútip otyrmyz. Tergeý júrip jatyr. Soty kelesi jyldyń qańtar aiynyń ortasyna josparlanǵan. Ózderińiz biletindei, ol jaqta kóp adam ustaldy. Ýaqyty kelgende soty bolady. Sol sotta sheshim qabyldanady. Advokat taptyq, týystary Gonkongqa bardy. Olarmen kezdesý ótkizdik. Quqyqtyq kómek kórsetip jatyrmyz», - degen edi Aibek Smadiiarov.
