Qazaqstandyq boksshy Gennadii Golovkin (41-1-1, 36 KO) japoniialyq Riota Mýratany (16-2, 13 KO) jeńdi, - dep habarlaidy "Ult aqparat".
Kezdesý Japoniianyń Saitama qalasynda ótti. Boks keshinde Golovkinniń orta salmaqtaǵy IBF jáne IBO, Mýratanyń WBA Super belbeýi sarapqa salyndy.
Jekpe-jek shyn máninde tartysty ótip, Gennadii Riotany 9-raýndta tehnikalyq nokaýtpen jeńdi. Japon boksshysy nokdaýn alǵan kezde onyń buryshy ringke oramal tastady.
Osylaisha, keshe ǵana 40 jasqa tolǵan Golovkin óziniń myqtylyǵyn tanytyp, kásipqoi karerasynda 42-jeńisine qol jetkizip otyr.
Kesh sońynda otandasymyz japoniialyq qarsylasyna qatysty oiyn aitty.
«Bul jolǵy qarsylasym - Olimpiada chempiony ári WBA tujyrymy boiynsha sýper chempion. Ol - naǵyz kúresker. Búgin sony ringte dáleldi. Japoniia jerinde osyndai úlken sport oqiǵasy ótkenine qýanyshtymyn. Óz elderimizdiń jarqyn ókilderi retinde jaqsy shoý kórsete aldyq dep oilaimyn», - dedi GGG.
Sondai-aq, ol jekpe-jekke kelgen qazaqstandyq jankúierlerge alǵys bildirdi.
"Maǵan jankúier bolǵan barlyǵyńyzǵa alǵys aitqym keledi. Ásirese, Qazaqstannan kelgen jankúierler. Rahmet, sizderge, jigitter! Alǵa, Qazaqstan", - dedi Golovkin sóz sońynda.
Aita keteiik, Golovkin keiingi jekpe-jegin 2020 jyldyń jeltoqsanynda AQSh-ta poliak Kamil Sheremetaǵa qarsy ótkizip, ony nokaýtqa túsirgen edi. Sol kezde 21-ret álem chempiony atanyp, rekord ornatqannan keiin ringke shyqpaǵan. Al Mýrata bolsa ringke 2019 jyldyń jeltoqsanynan beri shyǵyp otyr, sol kezde kanadalyq Stiven Batlerge qarsy kezdesýde titýlyn sátti qorǵaǵan.
GGG Mýratanyń belbeýin jeńip alyp, sýperchempion atandy. Qazaqstandyq boksshy osymen 42-shi jekpe-jegin ótkizdi. Sonyń ishinde 37-si nokaýtpen aiaqtaldy.
Golovkinniń kepildendirilgen gonorary 5 million dollardy quraidy. Oǵan qosa, PPV-dan túsetin aqshanyń 70 protsentin alady. Osylaisha, barlyq gonorardyń kólemi, shamamen, 12-15 mln dollar bolady. Al Mýrata 500 myń dollar + PPV-diń 30 protsenti. Onyń gonorary 1,5 milliona dollarǵa deiin barady.
Gennadii Golovkinniń kelesi qarsylasy – meksikalyq Saýl Alvares. Biraq Kanelo aldymen 7 mamyrda ótetin boks keshinde Dmitrii Bivoldy jeńýi kerek. Jaqynda Golovkin men Alvares úshinshi jekpe-jekti ótkizý týraly kelisimshartqa qol qoidy. Boks keshi 17 qyrkúiekte ekinshi orta salmaqta uiymdastyrylady. Las-Vegas bul shoýdy ótkizýge favoritterdiń qatarynda, biraq basqa aimaqtar da ótinim berdi.
