Tanymal qazaqstandyq kásipqoi boksshy, burynǵy álem chempiony Gennadii Golovkin DAZN USA-ge bergen suhbatynda mansabyn neshe jasynda aiaqtaýdy josparlap otyrǵanyn aitty, dep habarlaidy QazAqparat tilshisi.
Taiaýda Golovkin DAZN-men alty aiqasqa josparlanǵan úsh jyldyq kelisim jasady. Ol 2021 jylǵa deiin jalǵasady.
«Men 40 jasymda toqtaityn shyǵarmyn. Degenmen, bolashaqty bilý múmkin emes... Maǵan qazir ol týraly aitý qiyn, biraq 40 jasymda promoýshenimmen maqsatty túrde ainalysqym keledi», - dedi Golovkin suhbatynda.
Jýrnalist «Jubaiyńyz 40 jasta judyryqtasýǵa ruqsat beredi me?» dep surady.
«Onyń ornyna jaýap berý qiyn, sebebi biz onymen bul suraqty durystap talqylaǵan joqpyz. Biraq, 40 jasta ózińniń aldyńdaǵy emes, otbasyńnyń aldyndaǵy jaýapkershilikti sezinýiń kereksiń ǵoi», - dedi qazaqstandyq boksshy.
Golovkin áńgimelesý barysynda DAZN-men seriktestik týraly aitty.
«Bizdiń damyǵymyz keletin baǵytymyz bir. Qazirgi ýaqytta seriktespiz, meniń bolashaǵym jáne meniń promoýshenymnyń bolashaǵy úshin DAZN-men jumys istegenim jaqsy bolady», - dedi Gennadii Golovkin.
Qazaqstandyq boksshy Kanelomen úshinshi aiqastyń múmkindigine qatysty pikir bildirdi.
«Ekeýmiz úshin de, jankúierler úshin de bul óte mańyzdy. Eger olar osy jekpe-jekti kórgileri kelse, eger shynymen qyzyǵýshylyq týsa, bul aiqas bolady», - dedi G. Golovkin.
