Almaty oblysynda kelesi jyldyń sáýir aiynda kartop óńdeitin zaýyt salynabaq. Bul týraly oblys ákimi Amandyq Batalov «Farm Frits Kazakhstan» JShS ókilderimen kezdesý barysynda aitty.
Aty atalǵan gollandyq kompaniiamen aradaǵy kartop óńdeitin zaýyt qurý týraly kelisimder 2016 jyldyń tamyz aiynda bastaldy. Sonyń nátijesinde, búgingi kúni Ile aýdanyndaǵy «Bereke» indýstrialdy aýmaǵynda zaýyt qurylysyn salýǵa 25 gektar jer bólingen. Sondai-aq, kompaniia men memlekettik organdar jəne qarjy institýttary arasyndaǵy birlesken jumystar sátti jalǵasýda.
Qazaqtaǵy «Keńesip pishken ton kelte bolmaidy» degen sóz qandai aqiqat bolsa, eki jaqty kelisimmen ómirge kelgen jobanyń da jeter jetistigi az bolmasa kerek. Bul turǵyda kompaniia ókili, joba jetekshisi Ios den Boer qazaqstandyq áriptesteriniń iskerligine rizashylyǵyn bildirdi. Ol zaýyt qurylysyn josparly júrgizý úshin qazaqstandyq «Evraziia» kompaniialar tobymen seriktes bolyp, birlesken qyzmet týraly kelisimshartqa qol qoiylǵanyn jetkizdi.
Rasynda, bul baǵyttaǵy jumys oblysta qarqyndy túrde atqaryla bastady. Aitalyq, biyl Raiymbek aýdanynda «Jetisý» ƏKK arqyly kartop sharýashylyǵyn damytýdyń servistik-daiyndaý ortalyqtary qurylyp, qajetti tehnika satyp alynǵan. Olar səýirde gektaryna 350 tsentnerden ónim beretin gollandiialyq sorttyń 240 tonna sapaly tuqymyn otyrǵyzady.
Sonymen qatar, Qapshaǵai qalasy da kartop ósirýdi damytýda mol múmkindikke ie. Osy rette, óńir basshysy gollandyq kompaniiamen birlesip atqarylatyn iri jobanyń jergilikti turǵyndardy turaqty jumyspen qamtýǵa jáne diqandardyń ónimin ýaqytyly ótkizýine tiimdi kómek bolatynyn aitty. Ári bul maqsattyń úddesinen shyǵýda aimaqtyń áleýeti mol ekenin tilge tiek etti.
– Oblysta qant qyzylshasy men júgeri sharýashylyǵy jaqsy damyp keledi. Memleket qoldaýynyń arqasynda aýylsharýashylyǵyn damytýǵa barlyq jaǵdai jasalǵan. Bizde sharýalardyń shikizattaryn qabyldap, daiyn ónim shyǵaratyn zaýyttar bar. Sondyqtan osyndai iri zaýyt ashylatyn bolsa, óńirdegi kartop óndirisin damytýǵa yqpal eter edi, – dedi Amandyq Ǵabbasuly.
Aita keteiik, kompaniia joba qurylysy sátti aiaqtalǵan jaǵdaida 2020 jyldyń qazanynda alǵashqy ónimin jurtqa usynbaq. Sonymen birge, onda kartop ónimderi ǵana óńdelip qoimai, daqyldardy óńdep-óndirý kózdelip otyr.
Qozybai QURMAN,
Almaty oblysy
