Gold Company LTD qarjy piramidasy qazaqstandyqtardyń 9 mlrd teńgeden astam qarajatyn iemdengen. Bul týraly QR IIM Tergeý departamentiniń bastyǵy Sanjar Ádilov aitty, dep habarlaidy QazAqparat.
«Qazaqstan men Resei azamattarynan turatyn Gold Company LTD qarjy piramidasyn uiymdastyrýshy qylmystyq topqa qatysty isti tergeý nátijelerin jetkizgim keldi. Olar bizdiń azamattarymyzǵa internettegi oidan shyǵarylǵan investitsiialyq jobalardan joǵary paida tabýǵa ýáde berip, 9 mlrd teńgeden astam qarajatyn iemdengen», - dedi Sanjar Ádilov Ortalyq kommýnikatsiialar qyzmetindegi baspasóz máslihatynda.
Onyń dereginshe, kinálilerdiń qylmystyq áreketterinen 4 myńnan astam azamat zardap shekti.
«Atalǵan qarjy piramidasynyń qyzmetine Aqtóbe oblysynyń politsiia departamenti tosqaýyl qoidy. Qazirgi ýaqytta is sotta», - dedi departament bastyǵy.
Aita keteiik, 2020 jyldyń qarasha aiynda Gold company LTD JShS uiymdastyrýshylaryna qatysty qylmystyq isti tergeý aiaqtalǵany habarlanǵan bolatyn. Sol kezde atalǵan qarjy piramidasynan 2,5 myńnan astam azamat zardap shekkeni, keltirilgen shyǵyn mólsheri 1,5 mlrd teńgeden asqany aitylǵan edi.
