Gold Company LTD قارجى پيراميداسى قازاقستاندىقتاردىڭ 9 ملرد تەڭگەدەن استام قاراجاتىن يەمدەنگەن. بۇل تۋرالى قر ٸٸم تەرگەۋ دەپارتامەنتٸنٸڭ باستىعى سانجار ەدٸلوۆ ايتتى, دەپ حابارلايدى قازاقپارات.
«قازاقستان مەن رەسەي ازاماتتارىنان تۇراتىن Gold Company LTD قارجى پيراميداسىن ۇيىمداستىرۋشى قىلمىستىق توپقا قاتىستى ٸستٸ تەرگەۋ نەتيجەلەرٸن جەتكٸزگٸم كەلدٸ. ولار بٸزدٸڭ ازاماتتارىمىزعا ينتەرنەتتەگٸ ويدان شىعارىلعان ينۆەستيتسييالىق جوبالاردان جوعارى پايدا تابۋعا ۋەدە بەرٸپ, 9 ملرد تەڭگەدەن استام قاراجاتىن يەمدەنگەن», - دەدٸ سانجار ەدٸلوۆ ورتالىق كوممۋنيكاتسييالار قىزمەتٸندەگٸ باسپاسٶز مەسليحاتىندا.
ونىڭ دەرەگٸنشە, كٸنەلٸلەردٸڭ قىلمىستىق ەرەكەتتەرٸنەن 4 مىڭنان استام ازامات زارداپ شەكتٸ.
«اتالعان قارجى پيراميداسىنىڭ قىزمەتٸنە اقتٶبە وبلىسىنىڭ پوليتسييا دەپارتامەنتٸ توسقاۋىل قويدى. قازٸرگٸ ۋاقىتتا ٸس سوتتا», - دەدٸ دەپارتامەنت باستىعى.
ايتا كەتەيٸك, 2020 جىلدىڭ قاراشا ايىندا Gold company LTD جشس ۇيىمداستىرۋشىلارىنا قاتىستى قىلمىستىق ٸستٸ تەرگەۋ اياقتالعانى حابارلانعان بولاتىن. سول كەزدە اتالعان قارجى پيراميداسىنان 2,5 مىڭنان استام ازامات زارداپ شەككەنٸ, كەلتٸرٸلگەن شىعىن مٶلشەرٸ 1,5 ملرد تەڭگەدەن اسقانى ايتىلعان ەدٸ.
