Qaznette qazaqstandyq estradanyń tanymal ánshisi Tóreǵali Tóreáli túsirilgen video talqylanyp jatyr, - dep habarlaidy Tengrinews.kz agenttigi.
Kadrlarda qabaǵy qanaǵan jigit ózine belgili ánshi Tóreǵali Tóreáli shabýyl jasaǵanyn aitady. Kýágerlerdiń sózinshe, Tóreǵali esh sebepsiz kúsh kórsetken.
Oqiǵa týraly tolyǵyraq Join Me týristik agenttiginiń direktory Ińkár Shaimerdenova aityp berdi. Onyń aitýynsha, ánshiniń áreketinen Bekarys esimdi gid zardap shekken.
"Keshe bizdiń týrister gid Bekaryspen Kólsai men Qaiyńdyǵa eki kúndik saparǵa shyqty. Sol jerde Tóreǵali Tóreálimen kezdesken. Bir týrist ony tanyp, jai qarap qalypty. Tóreǵali qasyna kelip: "Maǵan nege olai qarap tursyń?!" dep tiisipti. Sosyn týrist ketip qalǵan", - dep bastady áńgimesin Ińkár Shaimerdenova.
"Biraz ýaqyttan keiin dárethanaǵa kezekte turǵan gid Bekarysqa shabýyl jasaǵan. Tóreǵali kóliginen túsip, ony uryp-soǵa bastaǵan: "Maǵan qalai qaradyń, ne qarap tursyń!" dep. Onyń bárin kórgen kýágerlerimiz, týristerimiz bar, soǵyp, keiin ketip qalǵan", - dedi Ińkár Shaimerdenova.
Týrfirma direktorynyń aitýynsha, ánshi bunymen qoimai, týristerdiń avtobýsy týrǵan turaqqa atpen kelip, ádipsiz qylyq kórsetip, bylapyt sózder aitqan. Kýágerlerdiń boljamy boiynsha, estrada ánshisi mas kúide bolǵan.
"Djip toqtady. Tóreǵali kólikten túsip, Bekarysty ura bastady. Júgirip kelgende, Tóreǵali ekenin kórdim. Men onyń qalai tepkenin de kórdim, bizdiń gid - jas jigitti urdy, tek tepkilep qana qoimai, onyń aiaǵynan jáne betinen uryp, qanatyp ketti. Biz video túsirip úlgerdik, ol birden kólikke minip, ketip qaldy. Olarǵa múldem qaraýǵa bolmaidy ma eken? Tóreǵali bunyńyz ábestik boldy, sizdi qurmetteitin edik", - deidi týrist áielder.
"Gid kózinen jaraqat aldy, qazir ol politsiiaǵa aryz jazyp jatyr. Tóreǵalidyń gidten keshirim suraýyn talap etemiz, buny bulai qaldyra almaimyz. Bizde kýágerler men beine dálelder bar", - dep túiindedi Ińkár Shaimerdenova.
Almaty oblysy Politsiia departamenti bastyǵynyń tergeý boiynsha orynbasary Rýstam Ábdirahmanov bul iske qatysty pikir bildirdi.
"Tekserý sharalary bastaldy. Almaty oblysy PD basshysynyń tapsyrmasy boiynsha mán-jaidy anyqtaý Kegen aýdandyq OP qyzmetkerlerine júkteldi. Almaty oblysynyń Politsiia departamenti júrgizilgen is-sharalardyń barysy men nátijelerin baqylaýǵa aldy", - dep jazdy ol.
