Germaniianyń federaldy politsiiasy Baltyq teńizindegi "Soltústik aǵyn" jáne "Soltústik aǵyn-2" gaz qubyrlarynyń zaqymdanǵan jerin tekserýge kirisken. DW habaryna qaraǵanda, Daniianyń Bornholm aralyna Germaniia áskeri teńiz kúshteriniń eki kemesi súńgýirlerin alyp ketken.
Eldiń qorǵanys ministrliginiń Býndestag qorǵanys komitetine jazǵan hatynda "Germaniia federaldy politsiiasy men býndesver qyzmetkerlerinen quralǵan zertteý toby jarylys bolǵan jerdi tekserý úshin Baltyq teńizine attanǵany" jaily jazylǵan.
Buǵan deiin Germaniia federaldy politsiiasy áskeri vedomstvodan kómek suraǵan. Missiiaǵa Germaniia áskeri teńiz kúshteriniń eki kemesi: mina izdegish "Dillingen" traly men túrli maqsatqa arnalǵan "Mittelgrýnd" kemeleri qosylǵan. Olar teńizge 7 qazanda shyqqan.
"Soltústik aǵyn" gaz qubyryna keltirilgen zaqymdy Shvetsiia biligi de zerttep jatyr. Taiaýda olar "aldyn ala qorytyndylar qaskúnemdik jasalǵanyn kórsetip otyr" dep habarlaǵan. Gaz qubyryna jaqyn mańda birneshe jarylys bolǵan. Bul diversiiaǵa jaýapkershilikti kim alatyny ázirge belgisiz. Buǵan deiin AQSh pen Eýropa odaǵy elderi de osyǵan uqsas habar taratqan.
Resei prezidenti Vladimir Pýtin 30 qyrkúiekte sóilegen sózinde "jarylysty aǵylshyn-saksondar jasady" dep aiyptaǵanymen, dálel keltirmegen. Resei biligi resmi túrde eshkimge aiyp taqpaǵan.
