Germaniiada pandemiia bastalǵaly jańa antirekord tirkeldi: bir táýlikte 1 244 adam koronavirýstan qaitys boldy, dep habarlaidy "Ult aqparat" koronavirýstyń taralýyna jol bermeý jónindegi QR Úkimeti janyndaǵy vedomstvoaralyq komissiianyń aqparatyna silteme jasap.
Germaniia meditsina mamandarynyń paiymynsha, koronavirýs boiynsha ahýaldyń aldaǵy jaqyn ýaqytta jaqsarýyn kútýdiń qajeti joq. Elde qańtar aiynyń sońyna deiin qatań karantin engizilgen. Biraq el biligi «mega-lokdaýn» engizýdi de qarastyrýda. Ol jaǵdaida qoǵamdyq kólik tolyq toqtaityn bolady.
Frantsiiada qoǵamdyq kólikter jumys isteidi jáne dúkender de ashyldy, biraq komendanttyq saǵat kúsheitildi: endi keshki saǵat 6-dan keiin sebepsiz kóshege shyǵýǵa bolmaidy (buǵan deiin tyiym 20:00-den bastalǵan bolatyn).
Ispaniiada 100 myń turǵynǵa shaqqanda koronavirýsty juqtyrý kórsetkishi qaitadan 500 adamnan asyp ketti. Andalýsiia, Mýrsiia, Kastiliia-Leon avtonomdy qaýymdastyqtarynyń basshylary óz aimaqtarynda úide oqshaýlaý rejimin engizý úshin el úkimetinen quqyq pen múmkindik berýdi surap otyr.
Dúniejúzilik densaýlyq saqtaý uiymynyń halyqaralyq sarapshylar toby Qytaidyń Ýhan qalasyna koronavirýstyń shyǵý sebebin zertteý úshin keldi. Jumysqa kirispes buryn 10 sarapshy eki aptalyq karantinnen ótýleri kerek. Birneshe ai boiy bolǵan turaqtylyqtan keiin, sońǵy aptada Qytaida koronavirýs infektsiiasynyń táýliktik tirkelgen sany kúrt ósti. Olardyń kópshiligi tótenshe jaǵdai jariialanǵan Hebei provintsiiasynda anyqtalǵan.
