Germaniia 2005 jyldan beri Qazaqstan ekonomikasyna 5,5 mlrd dollar tikelei investitsiia saldy. Bul týraly QR Premer-Ministriniń birinshi orynbasary Roman Skliar aitty, dep habarlaidy QazAqparat.
«Pandemiiadan týyndaǵan shekteýler jaǵdaiynda biz ekijaqty ekonomikalyq yntymaqtastyqty damytý tendentsiiasyn saqtap qana qoimai, sonymen birge onlain formatty barynsha paidalana otyryp, naqty jobalar men usynystardy ilgerilete aldyq. Búginde Germaniia Qazaqstannyń mańyzdy seriktesi bolyp otyr. Saýda-ekonomikalyq yntymaqtastyqty tereńdetýge, investitsiialardy yntalandyrýǵa jáne ózara qorǵaýǵa baǵyttalǵan birqatar úkimetaralyq kelisim jumys isteidi», - dedi Roman Skliar elordada ótip jatqan Qazaqstan-german biznes forýmynda.
Onyń atap ótýinshe, eki eldiń yntymaqtastyǵy qazirgi ýaqytta da sátti damyp kele jatyr. Memleket basshysy Qasym-Jomart Toqaevtyń 2019 jáne 2020 jyldardaǵy Germaniiaǵa saparynan keiin ózara qarym-qatynas qarqyn ala tústi.
«Birlesken investitsiialyq jobalardy júzege asyrý barysynda týyndaityn suraqtar men máselelerdi sheshýge baǵyttalǵan úkimettik jumys toby quryldy. Sonymen qatar yntymaqtastyqtyń aǵymdaǵy máselelerin talqylaý úshin germaniialyq kompaniialarmen ai saiyn, onyń ishinde onlain formatta da kezdesýler ótkiziledi. Investitsiia turǵysynan alyp qarasaq, 2005 jyldan beri bizdiń ekonomikamyzǵa Germaniiadan shamamen 5,5 mlrd dollar tikelei investitsiia quiyldy. Onyń basym bóligi óńdeý ónerkásibine salyndy», - dedi ol.
