Ótken jyldyń qorytyndysy boiynsha jer qoinaýyn paidalanýshylardyń qazaqstandyq kadrlardy oqytýdy qarjylandyrýy 21 mlrd teńgeni qurady. Bul týraly QR Energetika ministri Nurlan Noǵaev halyq aldynda esep berý kezdesýinde aitty, dep habarlaidy QazAqparat.
«Qazirgi ýaqytta Qazaqstanda kómirsýtek shikizatyn barlaý men óndirýge arnalǵan 235 kelisimshart tirkelgen, onyń ishinde: «barlaýǵa» – 54, «birlesip barlaý men óndirýge» – 96, «óndirýge»– 74, «Ónimdi bólý týraly kelisim» boiynsha – 11. Ýran boiynsha 25 kelisimshart tirkelgen», - deidi QR Energetika ministri Nurlan Noǵaev
Onyń aitýynsha, geologiialyq barlaý jumystaryna investiialardyń kólemi –158,4 mlrd teńgeni qurady.
«Jyl qorytyndysy boiynsha jer qoinaýyn paidalanýshylardyń esebinen 144 myńnan astam qazaqstandyq maman oqytý, biliktilikti arttyrý nemese qaita daiarlaý rásiminen ótti. Qazirgi ýaqytta Ministrlik jer qoinaýyn paidalanýshylardyń ǵylymi-zertteý jáne (nemese) tájiribelik-konstrýktorlyq jumystardy qarjylandyrýy boiynsha mindettemelerin oryndaý jónindegi jumystardy júrgizip otyr. Búgingi tańda jer qoinaýyn paidalanýshylardyń ǵylymi-zertteý jáne tájiribelik-konstrýktorlyq jumystardy qarjylandyrýy boiynsha mindettemeleri jer qoinaýyn paidalanýǵa arnalǵan 163 kelisimshartta kózdelgen», - deidi ol.
2019 jylǵy qorytyndy boiynsha jer qoinaýyn paidalanýshylardyń ǵylymi-zertteý jáne tájiribelik-konstrýktorlyq jumystardy qarjylandyrýy 9,9 mlrd teńgeni qurady. Sondai-aq, ótken jyldyń qorytyndysy boiynsha jer qoinaýyn paidalanýshylardyń qazaqstandyq kadrlardy oqytýdy qarjylandyrý 21 mlrd teńgege jetti.
