QR Prezidentiniń janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń otyrysy Onlain formatta ótti, dep habarlaidy "Ult aqparat" komissiiaǵa silteme jasap.
Ulttyq komissiianyń tóraiymy Lázzat Ramazanova otyrysty asha otyryp, otbasy institýtyn nyǵaitý jáne turmystyq zorlyq-zombylyqtyń aldyn alý ózekti máselelerin talqylaý kezinde azamattyq qoǵammen tiimdi ózara is-qimyldyń mańyzdylyǵyn atap ótti.
«Óńirlerde ulttyq komissiia músheleriniń, Parlament depýtattarynyń, ÚEU ókilderiniń qatysýymen tiisti zańnamalyq bastamalardy talqylaý bastaldy. Otbasy institýtyn nyǵaitýǵa qatysty jurtshylyqtyń barlyq pikirleri men usynystary tyńdalady. Mundai format qoǵamnyń suranystaryn normativtik qujattarda kórsetip qana qoimai, olardy is júzinde júzege asyrýǵa múmkindik beredi. Qazaqstandyq otbasylardyń ál-aýqaty máseleleri – memlekettik saiasattyń basymdyǵynda jáne Nur Otan partiiasynyń sailaýaldy baǵdarlamasyn iske asyrý jónindegi Jol kartasyna engizilgen», - dedi Lázzat Ramazanova.
Otyrysta áielder men otbasy institýtynyń sybailas jemqorlyqtyń aldyn alýǵa áseri týraly aqparat usynyldy. Qazaqstannyń 2017-2020 jyldaryndaǵy, sondai-aq aǵymdaǵy jyldyń birinshi toqsanyndaǵy quqyqtyq statistikaǵa sáikes, sybailas jemqorlyqqa qarsy qyzmettiń óndirisinde 1394 áielge qatysty 1113 is qozǵaldy. Taldaý kórsetkendei, áielder negizinen bóten múlikti iemdený jáne talan-tarajǵa salý - 36,8% (513 adam), alaiaqtyq – 20% (282), para berý – 14,7% (205) jáne para alý-12,8% (178) túrinde qylmys jasaidy.
Sonymen qatar, Dúniejúzilik banktiń Eýropa, Afrika jáne Aziianyń 150 memleketinde júrgizgen zertteýleri sybailas jemqorlyqtyń tómendeýine áielderdiń saiasattaǵy jáne zań shyǵarý organdaryndaǵy neǵurlym joǵary ókildigi áser etetindigin kórsetti. Sybailas jemqorlyq deńgeii eń tómen elder – Daniia, Shvetsiia, Finliandiia, Norvegiiada saiasi laýazymdarda basqa memleketterge qaraǵanda áielder kóp. Eksperiment retinde politsiia qyzmetine qosymsha 2,5 myńnan astam áieldi tartqan Perý biliginiń tájiribesi erekshe, bul eksperiment quqyq qorǵaý organdaryndaǵy paraqorlyqty kúrt tómendetti.
Kezdesýde sondai-aq Aqmola oblysynda genderlik baǵdarlanǵan biýdjetteýdi engizý jónindegi jobanyń qorytyndylary shyǵaryldy. Mundai tetik EYDU-nyń kóptegen elderinde keńinen qoldanylady. Biýdjetti qalyptastyrý kezeńinde memlekettik organdar áielder men erlerdiń qajettilikterin eskeredi, bul halyqtyń ómir súrý sapasyn arttyrýǵa jáne qarjy qarajatyn utymdy paidalanýǵa múmkindik beredi.
«Genderlik biýdjetteý – bul eń aldymen árbir azamattyń qajettilikterin esepke alý jáne qarajatty utymdy paidalaný. Biýdjetti qalyptastyrý kezinde qansha áiel men er adam emdelýge muqtaj ekenin túsiný kerek. Eńbek naryǵyndaǵy aýytqýlardy boldyrmaý úshin jigitter men qyzdardy qandai mamandyqtarǵa oqytý kerek. Uldar men qyzdardy buqaralyq sportqa tartý úshin qalalar men aýdan ortalyqtarynda qandai sport sektsiialaryn ashý kerek. Mundai tetikti engizý - bir kúnniń máselesi emes, daiyndyq jumystary qajet. Biraq genderlik baǵdarlanǵan biýdjet aldyńǵy qatarly elderde tiimdiligin dáleldedi, sondyqtan biz osy baǵytta jumys jasaýymyz kerek», - dedi Lázzat Ramazanova.
Otyrys qorytyndysy boiynsha tiisti ortalyq memlekettik jáne jergilikti atqarýshy organdarǵa birqatar tapsyrmalar men usynystar berildi.
