Almaty oblysynyń Qaskeleń qalasynda Talǵar aýdanynyń 24 jastaǵy turǵyny Janasyl Sársenbaidyń ólimine qatysty sot bastaldy. Is boiynsha úsh jas jigit sot aldynda otyr. Protsess ashyq ótip jatyr, dep habarlaidy ult.kz.
KTK arnasynyń málimetinshe, tergeý nusqasyna sáikes, sottalýshylardyń biri Janasylǵa pyshaq jaraqatyn salǵan. Jas jigit aýrýhanada kóz jumdy. 19 jáne 20 jastaǵy úsh jigittiń bireýi kisi óltirdi, qalǵan ekeýi qylmysty jasyrdy dep aiyptalyp otyr.
Oqiǵa mamyr aiynda bolǵan. Marqum inisimen birge ákesiniń ziratyna baryp qaityp kele jatqanda, jolyn jastar mingen kólik bógegen. Janasyl jol berýdi surap belgi bergen. Keiin kólikti ainalyp ótip ketken. Osydan soń jastar onyń sońynan erip, úiine deiin barǵan.
Sotta sottalýshylardyń biri oqiǵany baiandap, Janasylǵa pyshaq suqqan jigittiń keiin júrgizýshige «gazdy bas» degenin aitty.
Marqumnyń aǵasy Erkebulan Sársenbaidyń sózinshe, úsh jigit kólikten túsip, eshqandai áńgimesiz Janasylǵa pyshaqpen shabýyl jasaǵan.
Janasyl aýrýhanada qaitys boldy. Anasy sottalýshylarǵa qatań jaza taǵaiyndaýdy surady. Jábirlenýshi tarap 100 million teńge ótemaqy talap etip otyr.
Sotta is «Kisi óltirý» jáne «Qylmysty jasyrý» baptary boiynsha qaralýda. Aiyp taǵylǵan baptarǵa sáikes, sottalýshylar alty jyldan 15 jylǵa deiin bas bostandyǵynan aiyrylýy múmkin.
