QR Prezidenti Qasym-Jomart Toqaevtyń «Abai jáne XXI ǵasyrdaǵy Qazaqstan» atty maqalasy ult ádebieti men mádenietin jańa deńgeige kóterýge yqpal etedi.
Mundai pikirdi Qazaq ulttyq qyzdar pedagogikalyq ýniversitetiniń rektory, pedagogika ǵylymdarynyń doktory, professor Gaýhar Aldambergenova bildirdi, dep habarlaidy QazAqparat.
«Memleket basshysynyń ultymyzdyń uly aqyny, aǵartýshy Abai Qunanbaiuly týraly elimizdiń bas basylymy «Egemen Qazaqstan» gazetinde jariialanǵan maqalasymen tanystym. Maqalada hakimniń mereitoiyn joǵary deńgeide atap ótýdiń baǵyttary men tetikteri aiqyn kórsetilgen. Prezident josparlanǵan sharalardyń barlyǵy «toi toilaý úshin emes, oi-órisimizdi keńeitip, rýhani turǵydan damýymyz úshin ótkizilmek» ekendigin erekshe atap ótken. Rasynda da, dara, dana Abaidyń toiy oidyń toiy bolýy qajet. Uly Abaidyń toiy taǵylymnyń toiy bolýy tiis», – deidi Qyzdar ýniversitetiniń rektory.
Sonymen qatar Gaýhar Aldambergenova ulttyq sanany jańǵyrtýdaǵy Prezident maqalasynyń yqpaly jaiynda aitty.
«Meniń paiymdaýymsha, Qasym-Jomart Kemelulynyń maqalasy Elbasy Nursultan Ábishuly Nazarbaevtyń «Bolashaqqa baǵdar: rýhani jańǵyrý» atty maqalasynyń jalǵasy ispettes. Qazaqstannyń Tuńǵysh Prezidenti baǵdarlamalyq maqalasynda qoǵamdyq sanany qaita túletýdiń mańyzdylyǵy týraly aitqan bolatyn. Búginde ulttyq sanany saqtaý jáne ony zaman talabyna beiimdeý memlekettik mańyzy bar máselege ainaldy. Sanany jańǵyrtýǵa Abaidyń ómirsheń shyǵarmalary zor yqpal etedi. Bul týraly maqalada egjei-tegjeili jazylǵan. «Uly aqynnyń shyǵarmalary búgin de ózektiligin joǵaltqan joq. Abaidyń oi-tujyrymdary barshamyzǵa qashanda rýhani azyq bola alady. Sondyqtan ultymyzdy jańǵyrtý isinde onyń eńbekterin basshylyqqa alyp, utymdy paidalaný jaiyn taǵy bir márte oi eleginen ótkizgen jón» dep atap ótti Prezident. Shyndyǵynda da «Adamzattyń Abaiy» atanǵan aqynnyń ádebi murasy búgingi kúnde de, bolashaqta da óziniń máni men mańyzyn joimaidy. Ol – ultymyzdyń rýhani jańǵyrý jolyndaǵy temirqazyǵy hám shamshyraǵy ispetti», – dedi óz sózinde Gaýhar Tóremuratqyzy.
Ýniversitet basshysynyń aitýynsha, búginde qazaq qyzdarynyń parasat mektebine ainalǵan Qyzdar ýniversitetinde Abai Qunanbaiulynyń 175 jyldyǵyna arnalǵan daiyndyq jumystary bastalyp ketken. Hakimniń mereitoiyna orai oqý ornynda «Óleń – sózdiń patshasy...» atty respýblikalyq jas aqyndar aitysy ótedi. Sharaǵa elimizdiń joǵary oqý oryndarynyń stýdentteri qatysady. Aitys barysynda aqyndar «Abai – dana, Abai – dara», «Rýhani jańǵyrý – basty baǵdar», «Týǵan jer turǵan jermen ólshenbeidi», «Ana tilim – ardaǵym», «Táýelsizdik – tuǵyrym» taqyryptary boiynsha sóz jarystyrady.
«Bir bul ǵana emes. Byltyrǵy oqý jylynan bastap ýniversitette «Abaitaný» kýrsy engizildi. Búginde stýdentterge abaitanýdyń bastaýlary, aqynnyń ómiri men shyǵarmashylyq joly oqytylýda. Bolashaq pedagogtar kýrs barysynda abaitaný máseleleriniń damý baǵyttarymen, onyń aqyndyq mektebimen jáne hakimniń «Tolyq adam» filosofiiasymen tanysady. Osy oraida Qyzdar ýniversitetiniń professory, filologiia ǵylymdarynyń doktory Rýda Zaikenovanyń «Abaitaný» atty oqýlyǵy da jaryq kórdi», – dep atap ótti pedagogikalyq oqý ornynyń basshysy.
