Elimizge belgili zańger Abzal Quspan ánshi Gaýhar Álimbekovany qorǵaýǵa niet bildirip otyr. Bul týraly jýrnalist Sáýle Ábildahanqyzy óziniń Feisbýktaǵy paraqshasynda jazdy, dep habarlaidy "Ult aqparat".
"Halyqtyń súiikti ánshisi, belgili kompozitor Gaýhar Álimbekovany bilmeitin qazaq kemde-kem... Gaýhardyń ánderinsiz qazaqtyń toiy ótpegen... Toi jasaǵan, toi kórgen árqaisysyńyz (tipti, ony sottaǵan sol sottyń ózi de bálkim!..) Gaýhardyń ánimen kelin túsirip, Gaýhardyń ánimen qyz uzattyńyzdar...
Qazaq ónerine, qazaq mádenietine orasan zor eńbek sińirgen Gaýhardai talantynyń eńbegin baǵalap, Qazaqstan úkimeti qashan bir japyraq ataq nemese basyna baspana berdi? Ittiń itaqaiyna berip (satyp, úlestirip) jatqan QR Eńbek sińirgen qairatkeri degendi alsa, osy Gýhar alýy kerek edi ǵoi... Bizdiń Úkimet Gaýhardyń orny túrme dep sheshti..." - deidi jýrnalist Sáýle Ábildahanqyzy.
Ánshiniń basyna qara bult úiirilgenin jáne bul jaǵdaiǵa beijai qarap otyra almaitynyna niet bildire otyryp, zańger Abzal Quspanmen osy másele tóńireginde sóz qozǵaǵanyn aitady.
Advokat Abzal Quspan óz kezeginde bylai dep jaýap beripti:
– "Jalpy, otbasymda bolǵan sońǵy jaǵdailarǵa bailanysty kóp isten bas tartyp júrgenimdi bilesiń... tipti, Almatydaǵy, Astanadaǵy biraz jekelegen isterden bas tartyp, aqshalaryn qaitaryp berip, basqa advokat taýyp berip, tynysh qana úide jatqanmyn... biraz ýaqyt taim-aýt alyp, qyzymnyń jylyn bergenshe kóp iske kirispeimin, otbasymnyń janynda kóbirek bolamyn dep oilaǵan edim. Biraq myna jaǵdai basqa jaǵdai... Gaýhar Álimbekova – bárimizdiń súiikti ánshimiz. Gaýhardai eline eren eńbegi sińgen talantty arýymyzdyń basyna is túsip jatqanda, ári ózińniń ótinishińdi aiaqasty etkendei bolmaiyn dep, osy iske aralasqym kelip otyr. Buǵan taǵy mynadai birneshe sebep bar:
Birinshiden: Jalpy, túrme degen ne úshin salynady? Túrme degen – qoǵamǵa qaýipti adamdardy oqshaýlaý úshin, basqa adamdarǵa ziiany timeý úshin, qoǵamnan alastaý úshin salynady. Boldy! Túrmeniń basqa fýnktsiiasy joq! Iaǵni, adam óltirgen, bala zorlaǵan, áiel zorlaǵan, urlyq jasaǵan, kisi tonaǵan... qysqasy túrme – qoǵamǵa qaýipti, adamdardyń ómirine, densaýlyǵyna qaýip keltiretin qanisher, zorlyqshy, adamdardy qoǵamnan alys ustaý úshin salynady. Uryny qansha jerden sen tyiamyn deseń de, ol báribir urlyǵyn qoimaidy. Urlyq – psihologiialyq aýrýdyń bir túri dep esepteidi ǵalymdar... Kisi óltirgen qanisherler, zorlyqshylar ekinshi ret taǵy kisi óltirýi, zorlaýy ábden múmkin... Sóz joq, olardy qoǵamnan alastaý kerek...
Al endi Gaýhar Álimbekova kim? Ol - búkil qazaq eline tanymal tulǵa, belgili ánshi, talantty kompozitor. Dál sol Gaýhar bizdiń qoǵamǵa sonshalyqty qaýipti adam ba? Ony osynshama 6 jylǵa bas bostandyǵynan aiyratyndai ne kún týdy? Bul degen - óte aýyr jaza!
Bul sózime qarap basqalar oi túiip qalmasyn, «e, ol kináli eken, másele tek jazasynyń aýyrlyǵynda eken» dep. Joq. Onyń kináli-kinásiz ekendigin men ázirge tap basyp aita almaimyn. Men áli ispen tanyspaǵandyqtyn, istiń mán-jaiyn bilmegendikten, ázirge osylai aityp otyrmyn. Biraq oǵan berilgen jaza ÓTE AÝYR jaza jáne ÁDILETSIZ jaza ekendigin basa aitqym keledi. Bul kózge uryp tur.
Alysqa barmai-aq qoialyq, NIdi aitaiyq: 1 mln dollar para alyp jatqan jerinde ustalady, oǵan jaza taǵaiyndamaq túgili, isin qysqartyp tastaidy. Men biletin basqa da kóptegen ister bar, onyń bárin de ýaqyty kelgen kezde kórsetemin – qandai jaǵdaida bizdiń sýdialar qandai jaza taǵaiyndady – nebir óte aýyr qylmystar boiynsha óte jeńil jazalar taǵaiyndap keldi, túkke turǵysyz osyndai usaq-túiek, jeńil azamattyq ister boiynsha aýyr jazalar taǵaiyndaǵan ister óte kóp. Sonda sol isterdiń basy-qasynda júrgen bizdiń tergeýshilerdiń, prokýrorlardyń, sýdialardyń maqsaty ne?
Dál Gaýharǵa kelgende mundai jaza taǵaiyndaý kimge, ne úshin kerek boldy? Týra halyqtyń ádeii ashý-yzasyn týdyrǵysy kelgendei oi qaldyrady. Basqa joly joqtai, birden ái-shaiǵa qaramastan, 6 jyl bas bostandyǵynan aiyrady...
Taǵy qaitalap aitamyn, bir nárse anyq – Gaýhar qoǵamǵa qaýipti adam emes! Oǵan 6 jyl bas bostandyǵynan aiyratyndai eshqandai qajettilik joq edi. Taǵaiyndalǵan jaza óte ádiletsiz dep sanaimyn.
Ekinshiden, bizde ábden tájiribege engen másele bar, ol – bir adamnyń aryzymen «alaiaqtyq» babymen is qozǵaý óte qiyn jáne kóp jaǵdaida – 99,9 % múmkin emes! Mundai ister negizinen, azamattyq-quqyqtyq qarym-qatynas negizinde «aqsha berdiń be, óndirip al» dep keri qaitarylady. Dál Gaýharǵa bilekterin túrinip kiriskenderi meni tańǵaldyryp otyr...
Úshinshiden, bul, sóz joq, halyqtyń ashý-yzasyn týdyratyn nárse. Mysaly, Reseide, Alla Pýgacheva demei-aq qoiaiyq, kez-kelgen ortasha ánshiniń basynda osyndai jaǵdai bolýy múmkin be? Múmkin emes. Óitkeni olarda ult degen uǵym bar, ult namysy, ult maqtanyshy degen uǵym birinshi orynda turady. Ulttyq ónerge, ulttyq mádneietke qatysy bar adamdaryn olar munshalyqty qorlamaidy. Al bizde nege qazaqqa ǵana qadirli, qazaqqa ǵana syily adamdardyń basynan árkez osylai bult aiyrylmaidy? Mysaly, Tuńǵyshbai Jamanqulovty alyp qaraiyq. Qandai adam edi? Búkil halyqtyń mahabbatyna, qurmetine ie bolǵan adam edi! Osyndai ult maqtanyshtaryn biz op-ońai túrmege qamap, op-ońai sottap, halyqtyń pikirine pysqylyp ta qaramastan, halyqtyń aldyndaǵy bedelin op-ońai taptai salamyz. Bul bizdiń sot júiesiniń qoǵam pikirimen, qoǵam oiymen sanaspaityndyǵyn kórsetedi. Nege qoǵammen sanasý kerek deitin suraqqa keletin bolsaq, bul zańgerler arasynda áldeqashan belgili: sózimniń basyndai aittym ǵoi - qaýipti adamdardy qoǵamnan alshaqtatady. Iaǵni, qylmystyq is degen – qoǵamnyń múddesin qorǵaý úshin, qoǵamǵa qaýipti adamdardy qoǵamnan alastaý úshin qozǵalady. Sondyqtan qoǵamnyń pikiri bul jerde rol oinaý kerek, eskerilý kerek. Biz osyny eskerýdi umytyp baramyz. Bul óte ókinishti. Ia bolmasa, bizdiń bilik qazaq degen qoǵamnyń bar ekenin bilmeidi, bilse de, bilmegensidi, kórmegensidi, ia bolmasa, qazaqty kózge ilýge turmaityn qoǵam dep esepteidi. Qazaq – QR Konstitýtsiiasy booiynsha – memleket quraýshy ult. Osy jerdiń, eldiń iesimiz. Osylai ekenin bile tura, ádeii qazaqtyń shabyna túrtip, ashý-yzasyn týdyrǵysy keledi. Bul – jalǵyz Gaýharǵa qatysty emes, jalpy aityp otyrǵan másele.
Eger Gaýhar ózi senim bildirip, osy ispen ainalysýymdy surasa, Gaýhardai asyl qyzdarymyzdy qorǵamasaq, eldigimizge de, erligimizge de, advokattyǵyma da syn bolar".
