Almaty qalalyq sotynda belgili ánshi Gaýhar Álimbekovanyń isine qatysty apelliatsiialyq sot otyrysynda is boiynsha sottalǵan taǵy bir figýrant Ferýza Ordabaeva sóz sóiledi, - dep habarlaidy Tengrinews.kz tilshisi.
"Men bul qylmysty jasaǵanymdy moiyndaimyn. Biraq bul qylmys jasalyp jatqanda onyń zańsyz ekenin bilgenim joq. Alǵan aqshanyń barlyǵyn úidi salǵan túrkiialyq kompaniianyń ókilderine berdim. Al Gaýhar Álimbekovanyń bul qylmysqa tipten qatysy joq. Sebebi ol ózi de 40 myń dollardan eki úi alyp, ózi de shyǵynǵa batty", - dep málimdedi ol.
Sondai-aq, ol 2016 jyly dál osy is boiynsha sotty bolǵanyn, sondyqtan jaza merzimin sol ýaqyttan bastaýdy, óziniń asyraýynda úsh balasynyń baryn, onyń ishinde ekeýiniń kámelet jasyna tolmaǵanyn aityp, jeńil jaza qoldanýdy surady.
Eske salaiyq, elimizge tanymal ánderdiń avtory, ánshi Gaýhar Álimbekova 30 qańtarda alaiaqtyq úshin 6 jylǵa bas bostandyǵynan aiyrylǵan bolatyn. Kóp uzamai, ánshi sot sheshimi kúshine engenshe qolhatpen bosatyldy.
Keiinirek ánshiniń advokaty Jumaǵali Zinelov istiń mán-jaiyn aityp bergen edi. Advokat sot úkimimen kelispeitinin jáne taiaý arada apelliatsiialyq sotqa aryz túsiretinin málimdegen.
Aita keteiik, ánshiniń "Aq kelin", "Kóktemge hat", "Jas kelin", "Qyz sezimi", "Oralshy mahabbat", "Aqmaralym" ánderi jurtshylyqqa keńinen taralyp, tanymal bolǵan. Onyń ánine jazylǵan óleńderdi tanymal estrada juldyzdary oryndaǵan.
