Foto:vechastana.kz
Elordamyzda ǵashyqtyq sebebimen salynǵan tarihi ǵimarat bar. Ol - burynǵy Ýkrainanyń elshiligi qonystanǵan Kenesary men Beibitshilik kósheleriniń qiylysyndaǵy sáýleti jarasqan ádemi ǵimarat.
Úlken ulym men kelinimniń úii , osy kórkem saraiǵa jaqyn. Kelgen saiyn, keide osy kóshemen, iaǵni osy úidiń qasynan jii ótemiz. Bul úidi 1910 ‒ 1912 jyldary osy óńirge tanymal kópes Vasilii Kýbrin saldyrǵan eken.
Ǵimarat tarihy óte qyzyqty. Ótken ǵasyrda jergilikti kópes Vasilii Kýbrin, jumys saparymen birde Peterborǵa baryp, reti kelgende teatrǵa kirip, kórermender qatarynda, sahnada óner kórsetken ártisterdiń ónerin qyzyqtaidy. Sol kezde, bir sulý balerinany kórip, soǵan es-tússiz ǵashyq bolady. Qoiylymnyń sonynda ol bishi qyzǵa jolyǵyp, ózine turmysqa shyǵýǵa ótinish jasap, ózimen birge alyp ketpek bolady. Degenmen, balerina qyz oǵan, Peterbordaǵydai sáýletpen úi salyp beretin múmkindigi bolsa ǵana, turmysqa shyǵýǵa kelisimin beredi.
Aqmolaǵa oralǵan Vasilii Kýbrin kidirmesten úi salýǵa kirisedi. Peterbordan sáýletshi shaqyryp, sol qiyrdaǵy qalanyń úilerindei sáýletin aýdyrmai ǵimarat jobasyn syzdyrtyp, tezdetip úi salýdy bastap ketedi. Bir jylǵa tolar-tolmas ýaqytta bikeshtiń qalaǵan saraiy daiyn bolady. Osydan keiin Peterborǵa qaita barǵan Vasilii ýádesin oryndap kelgendigin aitady. Jas jigittiń ózine degen shynaiy sezimin túsingen bishi qyz kelisimin berip, turmysqa shyǵady.
Ókinishke qarai Vasilii Kýbringe bul úide uzaq turýdy taǵdyr jazbapty. Sol kezdegi birinshi dúniejúzilik soǵystyń bastalýy, Keńes úkimetiniń ornaýy , Kýbrinder áýletiniń mazasyn qashyryp, Reseige ketýlerine týra keledi. Qazan tóńkerisinen soń bul úide jumysshylar klýby men kitaphana ornalasady. Keiinen qalany basqaratyn atqarýshy komitettiń keńsesine ainalady. Al, alpysynshy jyldary oblystyq tarihi ólketaný murajaiyna meken bolady. 1998 jyly Almatydan elshilikter kóship keletin ýaqytta osy ǵimarat Ýkraina elshiligine beriledi.
