Aýyl sharýashylyǵy ministrligi paidalanylmai jatqan jaiylym jerdi ǵarysh monitoringimen anyqtaý júiesin basqa óńirlerge engizý máselesin pysyqtap jatyr, dep habarlaidy QazAqparat.
«Búgingi tańda Qazaqstanda aýyl sharýashylyǵy jerleriniń jalpy alańy 202 mln gektardy quraidy. Onyń ishinde aýyl sharýashylyǵyna paidalanylatyny – 106,4 mln gektar. Bosalqy jerler – 96,7 mln gektar (47,8%). Iaǵni aýqymdy jer paidalanýshylarǵa bekitilip berilmegen. Bizdiń negizgi mindetimiz – paidalanylmai jatqan barlyq aýyl sharýashylyǵy jerlerin ekonomikalyq ainalymǵa tartyp, olardy utymdy paidalaný», - dedi Aýyl sharýashylyǵy ministri Saparhan Omarov OKQ-da ótken baspasóz máslihatynda.
Onyń aitýynsha paidalanylmaityn aýyl sharýashylyǵy jerlerin anyqtaý jáne olardy utymdy paidalaný úshin 4 oblysta (Qostanai, Mańǵystaý, Aqmola jáne Shyǵys Qazaqstan oblystary) veb-portalda jerlerdi ǵaryshtyq monitoringileý derekteri paidalanylatyn pilot joba iske asyrylýda. Osy rette birinshi kezekte jaiylym alqaptary pysyqtaldy. Bul «Memlekettik jer kadastrynyń avtomattandyrylǵan aqparattyq júiesi» men «Aýyl sharýashylyǵy janýarlaryn birdeilendirý» veb-portaldaryndaǵy derekqorlardy integratsiialaý jolymen iske asyrylǵan. Iaǵni, júie belgilengen normativterge sáikes jaiylymdyq alqaptardyń aýyl sharýashylyǵy janýarynyń bir shartty basyna arnalǵan júktemesin avtomatty túrde salystyryp, tekseredi.
«Máselen, ǵaryshtyq monitoringteýdiń birinshi kezeńiniń derekteri boiynsha pilottyq óńirlerde 7,7 mln gektar alańda paidalanylmai jatqan jaiylymdyq alqap anyqtaldy. Olar boiynsha mynadai sharalar qabyldandy: 3026 sýbektige jalpy alańy 4,83 mln gektardaǵy buzýshylyqtardy joiý týraly habarlama joldandy. Aýyl sharýashylyǵy janýarlaryn birdeilendirý jáne taǵy basqa bazalardaǵy derekterdi túzetý arqyly 1,1 mln gektar sáikestendirildi. 2,6 mln gektar jaiylym memleket menshigine qaitaryldy», - dedi ol.
Ekinshi kezeńde pilottyq óńirlerde paidalanylmaityn egistikterdi anyqtaý júrgizilip, ol boiynsha 48,7 myń gektar anyqtalǵan. Túpkilikti nátijeler 2020 jyldyń 1 qarashasyna qarai daiyn bolady.
«Ǵaryshtyq monitoringtiń barlyq derekteri veb-portalda kórsetiledi, olar elektrondyq kartada belgilengen túrli-tústi shartty belgilerimen birge qaraý úshin qoljetimdi. Pilottyq joba sátti iske asqan jaǵdaida, bul tájiribe basqa óńirlerde de qoldanylady», - deidi Saparhan Omarov.
