Mamyr aiynda teńge 6,8 paiyzǵa nyǵaidy. Bul týraly búgin Úkimet otyrysynda Ulttyq bank tóraǵasy Ǵalymjan Pirmatov aitty, dep habarlaidy QazAqparat.
«Mamyrda jahandyq qarjy naryqtaryndaǵy belgisizdik pen qubylmalylyqqa qaramastan teńge baǵamy 1 AQSh dollary úshin 415,16 teńgege deiin nemese 6,8 paiyzǵa nyǵaidy. Ulttyq valiýtanyń nyǵaiýy munai-gaz naryǵyndaǵy joǵary baǵa men eksporttaýshylardyń salyq tólemderine, jeke tulǵalardyń shetel valiýtasyna suranysy tómendegendikten naryq qatysýshylary sentimentiniń ózgerýine, Resei rýbli baǵamynyń nyǵaiýyna bailanysty», - dedi Ulttyq bank tóraǵasy.
Ǵalymjan Pirmatovtyń atap ótýinshe, valiýta naryǵyndaǵy usynys kvazimemlekettik sektor sýbektileriniń valiýtalyq túsimin satýy esebinen qosymsha qoldaý tapty. Onyń kólemi mamyrda shamamen 598 mln dollar boldy.
«Biýdjetke iri salyq tólemderi kezeńi men valiýtany satýdyń tiisti qajettiligi aiasynda shetel valiýtasynyń usynysy suranystan asyp tústi. Salyq aptasy kezeńinde ótimdilikti qoldaý jáne shetel valiýtasynyń suranysy men usynysy arasynda qalyptasqan teńgerimsizdikti retteý maqsatynda Ulttyq Bank 110,5 mln dollarǵa shetel valiýtasynyń artyq usynysyn satyp aldy», - dedi ol.
