Bokstan Qazaqstan qurama komandasy Bangkoktegi Aziia chempionatynan oraldy. Bylǵary qolǵap sheberleriniń enshisinde qurlyq birinshiliginiń 2 altyn, 2 kúmis jáne 3 qola júldesi bar. Komanda músheleriniń Aziiadaǵy aiaq alysyna qandai baǵa beremiz? Jas boksshylardyń top jaryp, tájiribeli sportshylardyń tuǵyrdan kórinbeýine ne sebep? Bul týraly ulttyq quramanyń bas bapkeri Ǵalymbek Kenjebaev tolyǵyraq aityp berdi, dep habarlaidy Olympic.kz.
Qurlyq dodasynyń deńgeii biik
- Aziia chempionatynyń deńgeii jyl saiyn arta túsýde. Osy joly soǵan taǵy da kózim jetti. Ásirese, Úndistan komandasy qarqynyn kóbeitip, Ózbekstan burynǵy áleýetin arttyra túsken. Sondai-aq, Tájikstan boksshysy tuńǵysh ret Aziia chempiony atanyp, tájiribeli tailandtyqtar medalsiz qaldy. Munyń bári bokstyń barlyq elde qanat jaiyp, básekelester qatary molaiǵanyn kórsetedi. Ońtústik Koreia sportshylaryn da esepten shyǵarýǵa bolmaidy. Bul birinshilik bizdiń biraz qateligimizdi kórsetti. Moiyndaý kerek, áli kemshiligimiz bar. Endi solardyń aldyn alýǵa tyrysamyz.
Levit taza jeńildi
- Bangkok sharshy alańynda bizdiń tájiribeli eki boksshymyz jankúier údesinen shyqqan joq. 56 kelidegi álem chempiony Qairat Eráliev óziniń babynda emestigin kórsetti. Vasilii Levit jartylai finalda nokdaýnmen jeńildi. Levittiń jeńilisi kópshilik arasynda kóp pikir týdyrǵanymen, onyń taza utylǵanyn moiyndaý qajet. Óitkeni, bul – boks. Esten tandyratyn soqqyny kez-kelgen boksshy alýy múmkin. Ol úshin jas nemese tájiribeli bolýdyń qajeti joq. Levit qarsylasynyń aýyr soqqysyn jiberip aldy da, jeńilis tapty. Sportshynyń jasy úlkeigen saiyn jeńiske jetýdiń qiyndap ketetinin de umytpaý qajet.
91 kelide Vasiliidiń izin basatyn boksshylar joq emes. Biraq olarǵa áli biraz eńbektený kerek. Qazaqstan chempionatynda Bekzat Nurdáýletov finalǵa deiin súrinbei, aqtyq synda Vasiaǵa jol berdi. Demek, ol osy salmaqtaǵy elimizdiń eń myqty boksshysy. Sondai-aq, jasóspirimder Olimpiadasynyń jeńimpazy Aibek Oralbai da talantty sportshylardyń biri. Biraq ol áli úlken jarystardyń dýyna túsken joq. Levitpen de resmi túrde jolyqpady.
Aziia birinshiligine alyp barǵan ardager boksshylardyń ishinde Zákir Safiýllindi erekshe atap ótkim keledi. Tájiribeli ári óte eńbekqor jigit. Finalda jeńilse de, osy salmaqta elimizdegi eń úzdik boksshysy bolyp tur.
Tóreshiler bedelge qaraidy...
- 75 kelidegi Tursynbai Qulahmet óz mansabynda alǵash ret Aziia chempiony ataǵyn ielenip, elimizdiń Ánuranyn shyrqatty. Ol ózbekstandyq Israil Madrimovty jeńgenin bárińiz bilesizder. Osy jekpe-jekten keiin ózbek tarapy tóreshiler sheshimimen kelispei, sary qaǵaz kórsetti. Negizi, qarsylyq tanytyp, sary qaǵaz kórsetý júiesi áli resmi túrde júzege asqan joq. AIVA bul júieni álem chempionatynan bastap qoldanysqa engizýi múmkin. Sol sebepti, qurlyq birinshiliginde synaqtan ótkizý maqsatymen bárimizge eki sary qaǵazdan berdi. Iaǵni, kúmán týdyrǵan eki kezdesýge biz qarsylyq tanytyp, appeliatsiia bere alamyz. Bangkokte biz sary qaǵazǵa júgingen joqpyz.
Al Ózbekstan bapkerleriniń Madrimov jeńilisimen kelispeýi orynsyz. Tóreshiler 4:1 esebimen jeńisti bizge berdi. Demek, Qulahmet óz myqtylyǵyn dáleldep otyr. Qarsylastardyń dál bulai áreket etýine Israildyń bedeli de áser etken shyǵar. Óitkeni, Madrimov Ózbekstan quramasynyń kóshbasshysy, bet-beinesi sanalady. AQSh-ta kásibiler arasynda judyryqtasyp júr. Sondai tanymal boksshynyń Tursynbai syndy jas sportshydan jeńilgeni olardyń shymbaiyna batqan shyǵar. Keiin Madrimovti qonaqúide kórdik. Bet-aýzyna bizdiń balanyń biraz soqqylary tigen, jaraqaty kóp eken.
Jalpy, mundai kezdesýlerden soń sary qaǵaz kórsetý arqyly Ózbekstan tarapy tóreshilerge yqpal jasaýda. Búginde áýesqoi boks áleminde ózbek boksshylarynyń bedeli myqty bolyp tur. Teń deńgeide ótken jekpe-jekti tóreshiler ózbek boksshysynyń paidasyna sheshedi. AIVA-da olarǵa oń kózben qaraitynyn bárińiz bilesizder. Sondyqtan, mundai jekpe-jekterde aiqyn basymdyqpen jeńý qajet.
Bekke bosańsýǵa bolmaidy...
81 kelide Aziia chempiony atanǵan Bek Nurmaǵambetke áli kóp eńbekteý qajet. Onyń salmaǵyndaǵy úzdik boksshylar negizinen Eýropa men Amerikada. Ózbekstan quramasynyń úzdigi Bektemir Melikýziev te biylǵy Aziia dodasynan syrt qaldy. Sondyqtan, Bekke qateliktermen jumys istegen durys.
Álem chempionatyna attanatyn quram Prezident kýboginde anyqtalady
- Erteń Qyzylorda qalasynda bokstan Qazaqstan Spartakiadasy bastalady. Atalǵan synda jastardyń deńgeiin baiqap kóremiz. Aziia chempionatyna qatysqan quram jarystan bosatyldy. Sodan soń, Prezident kýbogi dodasy kútip tur. Sol básekede álem chempionatyna qatysatyn quram tolyǵymen anyqtalady. 75 kelidegi Ábilhan Amanqul men Tursynbai Qulahmet, 69 kelidegi Abylaihan Júsipov pen Aslanbek Shymbergenovter arasyndaǵy jeńimpazdar álemdik synǵa joldama almaq.
