بوكستان قازاقستان قۇراما كومانداسى بانگكوكتەگٸ ازييا چەمپيوناتىنان ورالدى. بىلعارى قولعاپ شەبەرلەرٸنٸڭ ەنشٸسٸندە قۇرلىق بٸرٸنشٸلٸگٸنٸڭ 2 التىن, 2 كٷمٸس جەنە 3 قولا جٷلدەسٸ بار. كوماندا مٷشەلەرٸنٸڭ ازيياداعى اياق الىسىنا قانداي باعا بەرەمٸز? جاس بوكسشىلاردىڭ توپ جارىپ, تەجٸريبەلٸ سپورتشىلاردىڭ تۇعىردان كٶرٸنبەۋٸنە نە سەبەپ? بۇل تۋرالى ۇلتتىق قۇرامانىڭ باس باپكەرٸ عالىمبەك كەنجەباەۆ تولىعىراق ايتىپ بەردٸ, دەپ حابارلايدى Olympic.kz.
قۇرلىق دوداسىنىڭ دەڭگەيٸ بيٸك
- ازييا چەمپيوناتىنىڭ دەڭگەيٸ جىل سايىن ارتا تٷسۋدە. وسى جولى سوعان تاعى دا كٶزٸم جەتتٸ. ەسٸرەسە, ٷندٸستان كومانداسى قارقىنىن كٶبەيتٸپ, ٶزبەكستان بۇرىنعى ەلەۋەتٸن ارتتىرا تٷسكەن. سونداي-اق, تەجٸكستان بوكسشىسى تۇڭعىش رەت ازييا چەمپيونى اتانىپ, تەجٸريبەلٸ تايلاندتىقتار مەدالسٸز قالدى. مۇنىڭ بەرٸ بوكستىڭ بارلىق ەلدە قانات جايىپ, بەسەكەلەستەر قاتارى مولايعانىن كٶرسەتەدٸ. وڭتٷستٸك كورەيا سپورتشىلارىن دا ەسەپتەن شىعارۋعا بولمايدى. بۇل بٸرٸنشٸلٸك بٸزدٸڭ بٸراز قاتەلٸگٸمٸزدٸ كٶرسەتتٸ. مويىنداۋ كەرەك, ەلٸ كەمشٸلٸگٸمٸز بار. ەندٸ سولاردىڭ الدىن الۋعا تىرىسامىز.
لەۆيت تازا جەڭٸلدٸ
- بانگكوك شارشى الاڭىندا بٸزدٸڭ تەجٸريبەلٸ ەكٸ بوكسشىمىز جانكٷيەر ٷدەسٸنەن شىققان جوق. 56 كەلٸدەگٸ ەلەم چەمپيونى قايرات ەرەليەۆ ٶزٸنٸڭ بابىندا ەمەستٸگٸن كٶرسەتتٸ. ۆاسيليي لەۆيت جارتىلاي فينالدا نوكداۋنمەن جەڭٸلدٸ. لەۆيتتٸڭ جەڭٸلٸسٸ كٶپشٸلٸك اراسىندا كٶپ پٸكٸر تۋدىرعانىمەن, ونىڭ تازا ۇتىلعانىن مويىنداۋ قاجەت. ٶيتكەنٸ, بۇل – بوكس. ەستەن تاندىراتىن سوققىنى كەز-كەلگەن بوكسشى الۋى مٷمكٸن. ول ٷشٸن جاس نەمەسە تەجٸريبەلٸ بولۋدىڭ قاجەتٸ جوق. لەۆيت قارسىلاسىنىڭ اۋىر سوققىسىن جٸبەرٸپ الدى دا, جەڭٸلٸس تاپتى. سپورتشىنىڭ جاسى ٷلكەيگەن سايىن جەڭٸسكە جەتۋدٸڭ قيىنداپ كەتەتٸنٸن دە ۇمىتپاۋ قاجەت.
91 كەلٸدە ۆاسيلييدٸڭ ٸزٸن باساتىن بوكسشىلار جوق ەمەس. بٸراق ولارعا ەلٸ بٸراز ەڭبەكتەنۋ كەرەك. قازاقستان چەمپيوناتىندا بەكزات نۇردەۋلەتوۆ فينالعا دەيٸن سٷرٸنبەي, اقتىق سىندا ۆاسياعا جول بەردٸ. دەمەك, ول وسى سالماقتاعى ەلٸمٸزدٸڭ ەڭ مىقتى بوكسشىسى. سونداي-اق, جاسٶسپٸرٸمدەر وليمپياداسىنىڭ جەڭٸمپازى ايبەك ورالباي دا تالانتتى سپورتشىلاردىڭ بٸرٸ. بٸراق ول ەلٸ ٷلكەن جارىستاردىڭ دۋىنا تٷسكەن جوق. لەۆيتپەن دە رەسمي تٷردە جولىقپادى.
ازييا بٸرٸنشٸلٸگٸنە الىپ بارعان ارداگەر بوكسشىلاردىڭ ٸشٸندە زەكٸر سافيۋلليندٸ ەرەكشە اتاپ ٶتكٸم كەلەدٸ. تەجٸريبەلٸ ەرٸ ٶتە ەڭبەكقور جٸگٸت. فينالدا جەڭٸلسە دە, وسى سالماقتا ەلٸمٸزدەگٸ ەڭ ٷزدٸك بوكسشىسى بولىپ تۇر.
تٶرەشٸلەر بەدەلگە قارايدى...
- 75 كەلٸدەگٸ تۇرسىنباي قۇلاحمەت ٶز مانسابىندا العاش رەت ازييا چەمپيونى اتاعىن يەلەنٸپ, ەلٸمٸزدٸڭ ەنۇرانىن شىرقاتتى. ول ٶزبەكستاندىق يسرايل مادريموۆتى جەڭگەنٸن بەرٸڭٸز بٸلەسٸزدەر. وسى جەكپە-جەكتەن كەيٸن ٶزبەك تاراپى تٶرەشٸلەر شەشٸمٸمەن كەلٸسپەي, سارى قاعاز كٶرسەتتٸ. نەگٸزٸ, قارسىلىق تانىتىپ, سارى قاعاز كٶرسەتۋ جٷيەسٸ ەلٸ رەسمي تٷردە جٷزەگە اسقان جوق. اٸۆا بۇل جٷيەنٸ ەلەم چەمپيوناتىنان باستاپ قولدانىسقا ەنگٸزۋٸ مٷمكٸن. سول سەبەپتٸ, قۇرلىق بٸرٸنشٸلٸگٸندە سىناقتان ٶتكٸزۋ ماقساتىمەن بەرٸمٸزگە ەكٸ سارى قاعازدان بەردٸ. ياعني, كٷمەن تۋدىرعان ەكٸ كەزدەسۋگە بٸز قارسىلىق تانىتىپ, اپپەلياتسييا بەرە الامىز. بانگكوكتە بٸز سارى قاعازعا جٷگٸنگەن جوقپىز.
ال ٶزبەكستان باپكەرلەرٸنٸڭ مادريموۆ جەڭٸلٸسٸمەن كەلٸسپەۋٸ ورىنسىز. تٶرەشٸلەر 4:1 ەسەبٸمەن جەڭٸستٸ بٸزگە بەردٸ. دەمەك, قۇلاحمەت ٶز مىقتىلىعىن دەلەلدەپ وتىر. قارسىلاستاردىڭ دەل بۇلاي ەرەكەت ەتۋٸنە يسرايلدىڭ بەدەلٸ دە ەسەر ەتكەن شىعار. ٶيتكەنٸ, مادريموۆ ٶزبەكستان قۇراماسىنىڭ كٶشباسشىسى, بەت-بەينەسٸ سانالادى. اقش-تا كەسٸبيلەر اراسىندا جۇدىرىقتاسىپ جٷر. سونداي تانىمال بوكسشىنىڭ تۇرسىنباي سىندى جاس سپورتشىدان جەڭٸلگەنٸ ولاردىڭ شىمبايىنا باتقان شىعار. كەيٸن مادريموۆتٸ قوناقٷيدە كٶردٸك. بەت-اۋزىنا بٸزدٸڭ بالانىڭ بٸراز سوققىلارى تيگەن, جاراقاتى كٶپ ەكەن.
جالپى, مۇنداي كەزدەسۋلەردەن سوڭ سارى قاعاز كٶرسەتۋ ارقىلى ٶزبەكستان تاراپى تٶرەشٸلەرگە ىقپال جاساۋدا. بٷگٸندە ەۋەسقوي بوكس ەلەمٸندە ٶزبەك بوكسشىلارىنىڭ بەدەلٸ مىقتى بولىپ تۇر. تەڭ دەڭگەيدە ٶتكەن جەكپە-جەكتٸ تٶرەشٸلەر ٶزبەك بوكسشىسىنىڭ پايداسىنا شەشەدٸ. اٸۆا-دا ولارعا وڭ كٶزبەن قارايتىنىن بەرٸڭٸز بٸلەسٸزدەر. سوندىقتان, مۇنداي جەكپە-جەكتەردە ايقىن باسىمدىقپەن جەڭۋ قاجەت.
بەككە بوساڭسۋعا بولمايدى...
81 كەلٸدە ازييا چەمپيونى اتانعان بەك نۇرماعامبەتكە ەلٸ كٶپ ەڭبەكتەۋ قاجەت. ونىڭ سالماعىنداعى ٷزدٸك بوكسشىلار نەگٸزٸنەن ەۋروپا مەن امەريكادا. ٶزبەكستان قۇراماسىنىڭ ٷزدٸگٸ بەكتەمٸر مەليكۋزيەۆ تە بيىلعى ازييا دوداسىنان سىرت قالدى. سوندىقتان, بەككە قاتەلٸكتەرمەن جۇمىس ٸستەگەن دۇرىس.
ەلەم چەمپيوناتىنا اتتاناتىن قۇرام پرەزيدەنت كۋبوگٸندە انىقتالادى
- ەرتەڭ قىزىلوردا قالاسىندا بوكستان قازاقستان سپارتاكياداسى باستالادى. اتالعان سىندا جاستاردىڭ دەڭگەيٸن بايقاپ كٶرەمٸز. ازييا چەمپيوناتىنا قاتىسقان قۇرام جارىستان بوساتىلدى. سودان سوڭ, پرەزيدەنت كۋبوگٸ دوداسى كٷتٸپ تۇر. سول بەسەكەدە ەلەم چەمپيوناتىنا قاتىساتىن قۇرام تولىعىمەن انىقتالادى. 75 كەلٸدەگٸ ەبٸلحان امانقۇل مەن تۇرسىنباي قۇلاحمەت, 69 كەلٸدەگٸ ابىلايحان جٷسٸپوۆ پەن اسلانبەك شىمبەرگەنوۆتەر اراسىنداعى جەڭٸمپازدار ەلەمدٸك سىنعا جولداما الماق.
