ەلەمدٸك پوپ-جۇلدىز شاكيرانىڭ بٸشكەكتەگٸ كونتسەرتٸ قىرعىزستاننىڭ مەدەني ٶمٸرٸندەگٸ ايتۋلى وقيعاعا اينالدى. 18 قازاندا «بيشكەك ارەنا» ستاديونىندا ٶتكەن شوۋعا ەلەمنٸڭ 33 ەلٸنەن كٶرەرمەن جينالدى. ولاردىڭ اراسىندا قازاقستان, رەسەي جەنە ٶزبەكستاننان كەلگەن جانكٷيەرلەر دە كٶپ بولدى, دەپ حابارلايدى ult.kz.
كونتسەرت ەنشٸنٸڭ Las Mujeres Ya No Lloran World Tour اتتى ەلەمدٸك تۋرنەسٸ اياسىندا ۇيىمداستىرىلدى. مىڭداعان كٶرەرمەن شاكيرانىڭ ساحناعا شىعۋىن اسىعا كٷتٸپ, ونىڭ ەلەمگە ەيگٸلٸ حيتتەرٸن بٸرگە شىرقادى. ەنشٸ كەش بارىسىندا Hips Don’t Lie, Waka Waka جەنە Whenever, Wherever سەكٸلدٸ تانىمال كومپوزيتسييالارىن ورىنداپ, ستاديوندى دۋمانعا بٶلەدٸ.
كەشتٸڭ ەڭ ەسەرلٸ سەتتەرٸنٸڭ بٸرٸ — شاكيرانىڭ كٶرەرمەندەرمەن قىرعىز تٸلٸندە امانداسۋى بولدى.
— كۋتمان كەچ, بيشكەك! كاندايسىڭار? — دەگەن ەنشٸنٸڭ سٶزٸ ستاديونداعى جۇرتتىڭ ىستىق ىقىلاسىنا يە بولدى.
كونتسەرت سوڭىندا شاكيرا بٸشكەكتٸكتەر مەن ارنايى كەلگەن جانكٷيەرلەرگە جىلى قابىلداۋى ٷشٸن العىس ايتتى.
شوۋعا دەگەن سۇرانىس تا جوعارى بولعان. كونتسەرت ٶتەتٸن كٷنٸ قىرعىزستاننىڭ تۋريزمدٸ دامىتۋ جٶنٸندەگٸ مەملەكەتتٸك اگەنتتٸگٸنٸڭ باسشىسى ەدۋارد كۋباتوۆ بارلىق بيلەتتٸڭ ساتىلىپ كەتكەنٸن مەلٸمدەدٸ.
ەلەمدٸك جۇلدىزدىڭ بٸشكەككە كەلۋٸ مەدەني شارامەن عانا شەكتەلمەي, ەلدٸڭ تۋريستٸك ەلەۋەتٸن تانىتۋعا دا مٷمكٸندٸك بەردٸ. بۇعان دەيٸن شاكيرانىڭ كونتسەرتٸنە بايلانىستى قىرعىزستانعا شامامەن 30 مىڭ شەتەلدٸك تۋريست كەلٸپ, ەل ەكونوميكاسىنا 30 ميلليون اقش دوللارىنا جۋىق تابىس تٷسۋٸ مٷمكٸن ەكەنٸ حابارلانعان بولاتىن.
وسىلايشا, بٸشكەكتەگٸ كونتسەرت ورتالىق ازييانىڭ حالىقارالىق مۋزىكالىق شارالاردى ٶتكٸزۋ مٷمكٸندٸگٸن كٶرسەتٸپ قانا قويماي, ٸرٸ مەدەني وقيعالاردىڭ تۋريزم مەن ەكونوميكاعا سەرپٸن بەرە الاتىنىن تاعى بٸر مەرتە اڭعارتتى.
