"Ortalyqtan basqarý" men "kollektivtik menshik" siiaqty túsinikter sovet kezeńinde sanasyna ábden sińgen halyqtyń táýelsizdik kezeńinde shynaiy ál-aýqaty jaqsarmai turyp, jekemenshik múlik-múkámmalyna kepil berilmei turyp, kásipkerler men tutynýshylar erkin naryq pen básekeniń qyzyǵyn kórmei turyp, jemqorlyq pen alym-salyqtyń zardaby joiylmai turyp, demokratiialyq protsester oblys, aýdan men aýyl deńgeiinde júrgizilmei jatyp, damýshy eldegi biliktiń aiaq astynan zańnamany "liberaldandyra" bastaýy ózine kór qazýmen teń.
Qazirgi qoǵam reaktsiiasy - "zań túsinbeitin saýatsyz halyqtyń shýy" emes, jeke basynyń áleýmettik-ekonomikalyq qaýipsizdigine kózi jetpeitin sharasyz hám sharshaǵan jandardyń "Jarylqaýdy áýeli bizden basta! Zańnamany órkenietti qylǵyń kelse, áýeli bizben órkenietti qarym-qatynas jasa!" degen talaby. Bul talap endi tek ulǵaia beredi. Tat basqan jazalaý mashinasynan qairan joq. Bilik bul sitýatsiiadan jemqorlyqty tyiý, ekonomikany diversifikatsiialaý, jumys oryndaryn ashý, ýrbanizatsiiany júieleý, aýyl deńgeiinde infraqurylymdy damytý boiynsha shynaiy reformalar jasai bastasa ǵana bútin shyǵady.
Ǵalym Boqashtyń feisbýktaǵy jazbasynan
