Qarashanyń 30-y kúni Býenos-Aireste "Úlken jiyrmalyq" (G20) liderleriniń sammiti bastaldy. Halyqaralyq aqparat agenttikteri sammittiń ashylýynda G20 liderleriniń birigip sýretke túsýi kezinde AQSh prezidenti Donald Tramp pen Resei prezidenti Vladimir Pýtin bir-birimen qol alyspady dep habarlady.
Tramp podiýmǵa birinshi bolyp kóterilgen Pýtinniń janynan ótkende ol turǵan jaqqa qarap, biraq sálemdespei óte shyqty dep habarlaidy agenttikter. Resei prezidentiniń baspasóz hatshysy Dmitrii Peskov eki prezident te amandasty, biraq sóilesýge ýaqyttary bolmady deidi.
Donald Tramp Saýd Arabiiasynyń taq murageri Muhammed bin Salmanmen de amandaspai, onyń qasynan ótip ketken. Pýtin men Salman qol alysyp, kúlimsirep amandasqan.
Sammit qarsańynda AQSh prezidenti Tramp Kerch buǵazyndaǵy oqiǵa týraly derektermen tanysqannan keiin Resei prezidenti Pýtinmen G20 sammitinde kezdesý ótkizýden bas tartqany týraly málimdegen. AQSh senaty Reseidiń Kerch buǵazynda Ýkrainaǵa qarsy "arandatý sipatyndaǵy is-qimylyn" aiyptaityn qarar qabyldaǵan. Qarashanyń 25-i kúni Resei shekarashylary Qyrym jaǵalaýynda Ýkrainanyń úsh áskeri kemesine oq atyp, ekipajymen qosa tutqyndaǵan.
Álemdik ulttyq jalpy ónimniń shamamen 85 paiyzy, álemdik saýdanyń 75 paiyzy "Úlken jiyrmalyqqa" enetin Avstraliia, AQSh, Argentina, Braziliia, Ulybritaniia, Germaniia, Úndistan, Indoneziia, Italiia, Kanada, Qytai, Meksika, Resei, Saýd Arabiiasy, Túrkiia, Frantsiia, Ońtústik Koreia, Ońtústik Afrika Respýblikasy, sonymen birge Eýropa Odaǵynyń úlesine tiedi. Álem turǵyndarynyń úshten ekisi osy elderde turady.
