Búgin Qazaqstan quramasy fýtzaldan álem chempionatynyń shirek finalynda Iranmen sheberlik baiqasty, dep habarlaidy QazAqparat.
Kezdesý asa tartysty ótti. Alǵashqy minýttarda irandyq sportshylar tizgindi óz qolyna alýǵa tyrysty. Nátijesinde birinshi kezeńniń 8-minýtynda Moslem Oladgobad esep ashsa, 15-minýtta Ahmad Esmailpýr esepti ústemelei tústi.
Ekinshi kezeńde qazaqstandyq fýtzalshylar alǵa qarai umtyldy. Oiynnyń 25-minýtynda Dáýren Tursaǵulov kózdegen nysanadan múlt ketken joq. Al 29-minýtta Arnold Knaýb tarazy basyn teńestirdi. Oiynnyń 39-minýtynda qazaqstandyq Tainan jeńis golyn soqty.
Osylaisha Qazaqstan qarsylasyn 3:2 esebimen jeńdi.
Toptyq kezeńde Qazaqstan quramasy Kosta-Rikadan 6:1, Litvadan 3:0 esebimen basym boldy. Al Venesýelamen 1:1 esebimen teń tústi. Odan keiin 1/8 finalda Tailandty 7:0 esebimen tize búktirdi.
Budan buryn 1/4 finalda Braziliia Marokkony 1:0 esebimen jeńgen bolatyn. Al Argentina men Resei kezdesýiniń negizgi kezeńi 1:1 esebimen aiaqtalyp, penaltide argentinalyqtar 5:4 esebimen jeńiske jetti. Búgin Portýgaliia - Ispaniia kezdesýi portýgaliialyqtar paidasyna 4:2 esebimen aiaqtaldy.
Endi 29 qyrkúiekte ótetin jartylai finalda Braziliia men Argentina kezdesse, 30 qyrkúiekte Qazaqstan men Portýgaliia oinaidy.
Qazaqstan quramasy budan buryn álem chempionatynyń finaldyq satysynda eki márte baq synaǵan edi. 2000 jyly birinshi kezeńnen asa almasa, 2016 jyly 1/8 finalǵa deiin jetti.
Álem chempionatynyń finaly 3 qazanǵa belgilengen.
