بٷگٸن قازاقستان قۇراماسى فۋتزالدان ەلەم چەمپيوناتىنىڭ شيرەك فينالىندا يرانمەن شەبەرلٸك بايقاستى, دەپ حابارلايدى قازاقپارات.
كەزدەسۋ اسا تارتىستى ٶتتٸ. العاشقى مينۋتتاردا يراندىق سپورتشىلار تٸزگٸندٸ ٶز قولىنا الۋعا تىرىستى. نەتيجەسٸندە بٸرٸنشٸ كەزەڭنٸڭ 8-مينۋتىندا موسلەم ولادگوباد ەسەپ اشسا, 15-مينۋتتا احماد ەسمايلپۋر ەسەپتٸ ٷستەمەلەي تٷستٸ.
ەكٸنشٸ كەزەڭدە قازاقستاندىق فۋتزالشىلار العا قاراي ۇمتىلدى. ويىننىڭ 25-مينۋتىندا دەۋرەن تۇرساعۇلوۆ كٶزدەگەن نىسانادان مٷلت كەتكەن جوق. ال 29-مينۋتتا ارنولد كناۋب تارازى باسىن تەڭەستٸردٸ. ويىننىڭ 39-مينۋتىندا قازاقستاندىق تاينان جەڭٸس گولىن سوقتى.
وسىلايشا قازاقستان قارسىلاسىن 3:2 ەسەبٸمەن جەڭدٸ.
توپتىق كەزەڭدە قازاقستان قۇراماسى كوستا-ريكادان 6:1, ليتۆادان 3:0 ەسەبٸمەن باسىم بولدى. ال ۆەنەسۋەلامەن 1:1 ەسەبٸمەن تەڭ تٷستٸ. ودان كەيٸن 1/8 فينالدا تايلاندتى 7:0 ەسەبٸمەن تٸزە بٷكتٸردٸ.
بۇدان بۇرىن 1/4 فينالدا برازيلييا ماروككونى 1:0 ەسەبٸمەن جەڭگەن بولاتىن. ال ارگەنتينا مەن رەسەي كەزدەسۋٸنٸڭ نەگٸزگٸ كەزەڭٸ 1:1 ەسەبٸمەن اياقتالىپ, پەنالتيدە ارگەنتينالىقتار 5:4 ەسەبٸمەن جەڭٸسكە جەتتٸ. بٷگٸن پورتۋگالييا - يسپانييا كەزدەسۋٸ پورتۋگالييالىقتار پايداسىنا 4:2 ەسەبٸمەن اياقتالدى.
ەندٸ 29 قىركٷيەكتە ٶتەتٸن جارتىلاي فينالدا برازيلييا مەن ارگەنتينا كەزدەسسە, 30 قىركٷيەكتە قازاقستان مەن پورتۋگالييا وينايدى.
قازاقستان قۇراماسى بۇدان بۇرىن ەلەم چەمپيوناتىنىڭ فينالدىق ساتىسىندا ەكٸ مەرتە باق سىناعان ەدٸ. 2000 جىلى بٸرٸنشٸ كەزەڭنەن اسا الماسا, 2016 جىلى 1/8 فينالعا دەيٸن جەتتٸ.
ەلەم چەمپيوناتىنىڭ فينالى 3 قازانعا بەلگٸلەنگەن.
