Búgin Qazaqstan quramasy fýtzaldan álem chempionatynda Braziliiamen 3-oryn úshin talasqa tústi, dep habarlaidy QazAqparat.
Fýtzalda Braziliia tájiribeli quramanyń biri sanalady. Atalǵan qurama álem chempionatynda bes dúrkin chempion ataǵyn jeńip alǵan.
Eki qurama tartysty oiyn ótkizdi. Nátijesinde oiynnyń 12-minýtynda qazaqstandyq fýtzalshylar qarsylastar qaqpasy mańynda shabýyl uiymdastyrdy. Ol braziliialyq qaqpashy Gittaǵa tiip, avtogol soǵyldy. Osylaisha birinshi kezeńnen keiin Qazaqstan quramasy qarsylasynan 1:0 esebimen basym tústi.
Ekinshi kezeńde tartysty jekpe-jek odan ári órbidi. Oiynnyń 25-minýtynda qazaqstandyq quramadan Tainan oilamaǵan jerden óziniń qaqpasyna gol soǵyp aldy. Ol 31-minýtta qarsylastar qaqpasyna gol soǵyp, qaitadan Qazaqstan quramasy alǵa shyqty. Degenmen odan keiin braziliialyqtar qatarynan Rodrigo 32, Ferrao 34, Le 35-minýttarda kózdegen nysanadan múlt ketken joq.
Qazaqstan qarsylasynan 2:4 esebimen jeńilip qaldy. Nátijesinde Braziliia álem chempionatynyń qola júldesine qol sozdy. Qazaqstan tórtinshi orynǵa turaqtady.
Sondai-aq, búgin finalda Portýgaliia jáne Argentina quramalary sheberlik baiqasady. Kezdesý elorda ýaqytymen 22:50-de bastalyp, «Qazsport» telearnasynan tikelei efirde kórsetiledi.
Eske salsaq, toptyq kezeńde Qazaqstan quramasy Kosta-Rikadan 6:1, Litvadan 3:0 esebimen basym bolsa, Venesýelamen 1:1 esebimen teń oinady.
Odan keiin 1/8 finalda Tailandtan 7:0 esebimen basym túsip, shirek finalda Irandy 3:2 esebimen súrindirdi. Al jartylai finalda Portýgaliiamen overtaimda 2:2 esebimen teń túsip, penalti tebýde qarsylasyna jol berdi.
Qazaqstan quramasy budan buryn álem chempionaty finaldyq satysynda eki márte baq synady. 2000 jyly birinshi kezeńnen asa almasa, 2016 jyly 1/8 finalǵa deiin jetti.
