Fýtzaldan 2022 jylǵy Eýropa chempionatyna irikteý kezeńindegi Qazaqstan quramasy synǵa túsetin besinshi topta bir oiyn ótti. Atalǵan toptaǵy Vengriia jáne Belarýs quramalary ózara sheberlik baiqasty, dep habarlaidy "Ult aqparat".
Esterińizge sala ketelik, budan buryn osy topta synǵa túsetin Izrail jáne Qazaqstan quramalarynyń 28 qańtarǵa belgilengen oiyny keiinge shegerilgenin habarlaǵan edik.
Kezdesý Rishon-le-Tsion qalasynda ótýi tiis bolatyn. Atalǵan memlekette 26-31 qańtar aralyǵynda koronavirýstyń taralýyna jol bermeý maqsatynda halyqaralyq reister jabyldy. Sondyqtan atalǵan oiyndy keiinge shegerý jóninde sheshim qabyldandy.
Al Vengriia jáne Belarýs quramalary arasyndaǵy kezdesýde majar fýtzalshylary 2:1 esebimen jeńiske jetti. Alǵashqy týrda vengriialyqtar Qazaqstannan 0:5 esebimen jeńilip qalǵan edi.
Al Belarýs quramasy syrt alańda Izraildi 3:0 esebimen tize búktirdi.
Osylaisha týrnir kestesinde Qazaqstan, Vengriia jáne Belarýs quramalarynyń qorjynynda úsh-úsh upaidan bar. Olardan qazaqstandyq fýtzalshylardyń bir oiyny kem. Sońǵy oryndaǵy Izrail ázirge upaiǵa qol jetkizgen joq.
Ekinshi týrdaǵy Izrail men Qazaqstan quramalary arasyndaǵy oiynnyń qashan ótetini belgisiz. Eýropalyq fýtbol qaýymdastyqtary odaǵy (UEFA) eki qurama arasyndaǵy oiyn ótetin jańa merzimdi keiin belgileitin boldy.
Úshinshi týrda qazaqstandyq fýtzalshylar óz alańynda 2 naýryzda Belarýsti qabyldasa, 3 naýryzda Vengriia men Izrail ózara kezdesedi.
