Búgin fýtboldan Italiia chempionaty máresine jetti, dep habarlaidy "Ult aqparat".
Biyl A seriiasynda Týrinniń «Iýventýs» komandasy chempion atandy. Týrindik klýb bul ataqqa eki týr buryn qol jetkizdi. Osylaisha komanda óziniń tarihynda 36 márte altynnan alqa taqty.
Nátijesinde Italiia klýbtarynyń arasynda bul jóninen rekordtyq kórsetkishke jetti. Taǵy bir aita keterligi - sońǵy segiz jylda A seriiasynda oǵan teń keletin klýb tabylmai tur.
«Iýventýs» sońǵy týrda «Roma» klýbymen kezdesti. Olar qarsylasyna 1:3 esebimen ese jiberdi. Soǵan qaramastan chempiondyq ataǵyn saqtap qaldy.
Biyl ekinshi oryn taǵdyry sońǵy týrǵa deiin sheshilgen joq. Oǵan «Inter», «Atalanta», «Latsio» komandalary talasty. Sońǵy týrda «Atalanta» men «Inter» ózara kezdesip, oiynda interlik fýtbolshylar 2:0 esebimen basym tústi.
Al «Latsio» syrt alańda «Napoli» klýbynan 1:2 esebimen jeńilip qaldy. Nátijesinde ekinshi oryn «Interge» buiyrdy. Odan keiingi eki oryndy «Atalanta» men «Latsio» ózara bólisti.
Atalǵan tórt komanda aldaǵy maýsymda UEFA Chempiondar ligasynda baq synaidy. Týrnir kestesinde besinshi jáne altynshy oryn alǵan «Roma» men «Milan» biyl UEFA Eýropa ligasyna qatysady.
Biyl A seriiasynan «Lechche», «Breshiia» jáne SPAL komandalary túsip qaldy. Olardyń ornyn V seriiasynda alǵashqy eki oryn alǵan «Benevento» jáne «Krotone» komandalary basty. Taǵy bir joldama 3-8 oryn alǵan komandalar arasyndaǵy plei-off satysy arqyly anyqtalady.
Esterińizge sala ketelik, A seriiasy koronavirýs pandemiiasyna bailanysty naýryz aiynda toqtatyldy. Odan keiin 20 maýsymda qaita jalǵasty.
A seriiasyndaǵy aldaǵy fýtbol maýsymy qashan bastalatyny belgisiz. Ázirge ol 12 qyrkúiekke josparlanyp otyr.
Eger Italiia chempionaty atalǵan merzimde bastalmaǵan jaǵdaida komandalar eki divizion boiynsha synǵa túsip, odan keiin plei-off kezeńine jalǵasýy múmkin.
