Qazaqstan quramasynyń burynǵy kapitany Baýyrjan Islamhannyń fýtboldan eki jylǵa shettetý jazasynyń merzimi aiaqtaldy, dep habarlaidy QazAqparat agenttigi Sports.kz saityna silteme jasap.
El quramasynyń 29 jastaǵy jartylai qorǵaýshysy búginnen bastap kásipqoi komandada jattyǵý jumystaryn bastaýyna múmkindik alyp otyr. Al jeltoqsan aiynan bastap kásipqoi kelisimshartqa qol qoiýyna bolady.
Eske salsaq, Baýyrjan Islamhan 2020 jyldyń qyrkúiek aiynda Birikken Arab Ámirliginiń «Al-Ain» komandasy quramynda Aziia Chempiondar ligasyndaǵy kezekti oiynynan keiin tapsyrǵan doping-synamasy oń nátije kórsetken. Odan tyiym salynǵan metilgeksanamin tabylyp, eki jylǵa úlken fýtboldan shettetildi.
Baýyrjan Islamhan 1993 jyly 23 aqpanda Taraz qalasynda dúniege kelgen. 2011 jyldan beri qazaqstandyq «Taraz», «Astana», «Qairat», Reseidiń «Kýban», Birikken Arab Ámirliginiń «Al-Ain» klýbtary jáne el quramasynda 311 oiyn ótkizip, 74 goldyń avtory atandy. El quramasynda 46 oiynda 3 gol soqty.
