قازاقستان قۇراماسىنىڭ بۇرىنعى كاپيتانى باۋىرجان يسلامحاننىڭ فۋتبولدان ەكٸ جىلعا شەتتەتۋ جازاسىنىڭ مەرزٸمٸ اياقتالدى, دەپ حابارلايدى قازاقپارات اگەنتتٸگٸ Sports.kz سايتىنا سٸلتەمە جاساپ.
ەل قۇراماسىنىڭ 29 جاستاعى جارتىلاي قورعاۋشىسى بٷگٸننەن باستاپ كەسٸپقوي كوماندادا جاتتىعۋ جۇمىستارىن باستاۋىنا مٷمكٸندٸك الىپ وتىر. ال جەلتوقسان ايىنان باستاپ كەسٸپقوي كەلٸسٸمشارتقا قول قويۋىنا بولادى.
ەسكە سالساق, باۋىرجان يسلامحان 2020 جىلدىڭ قىركٷيەك ايىندا بٸرٸككەن اراب ەمٸرلٸگٸنٸڭ «ال-اين» كومانداسى قۇرامىندا ازييا چەمپيوندار ليگاسىنداعى كەزەكتٸ ويىنىنان كەيٸن تاپسىرعان دوپينگ-سىناماسى وڭ نەتيجە كٶرسەتكەن. ودان تىيىم سالىنعان مەتيلگەكسانامين تابىلىپ, ەكٸ جىلعا ٷلكەن فۋتبولدان شەتتەتٸلدٸ.
باۋىرجان يسلامحان 1993 جىلى 23 اقپاندا تاراز قالاسىندا دٷنيەگە كەلگەن. 2011 جىلدان بەرٸ قازاقستاندىق «تاراز», «استانا», «قايرات», رەسەيدٸڭ «كۋبان», بٸرٸككەن اراب ەمٸرلٸگٸنٸڭ «ال-اين» كلۋبتارى جەنە ەل قۇراماسىندا 311 ويىن ٶتكٸزٸپ, 74 گولدىڭ اۆتورى اتاندى. ەل قۇراماسىندا 46 ويىندا 3 گول سوقتى.
