Qostanailyq «Tobyldyń» qaqpashysy Emil Balaev óz qaqpasyna 699 minýt boiy gol jibermegen. Bul 2019 jylǵy fýtbol maýsymynyń jańa rekordy, dep habarlaidy "Ult aqparat".
Ázerbaijan quramasynyń qaqpashysy sońǵy ret osy jyldyń 28 shildesi kúni «Qaisar» shabýylshysy Kýle Mbombodan gol jiberdi.
«Emil Balaev osy maýsymdaǵy óziniń rekordyn qaita jańartty. Buǵan deiin onyń kórsetkishi 683 minýt bolǵan. Eger ol aldaǵy matchta 14 minýt qaqpasyn «aman» ustasa, el birinshiligi tarihyndaǵy úzdik 5 qaqpashynyń qataryna enedi», - dedi klýbtyń baspasóz qyzmetindegiler.
Balaevtan keiingi satyda «Jetisý» oiynshysy Almat Bekbaev tur. Ol 172 minýt boiy qaqpasyna gol darytpady. Úzdik úshtikti «Tobyldyń» taǵy bir qaqpashysy Jasýr Nárziqulov túiindep tur.
Jalpy, qazaq fýtbolynyń tarihynda eń joǵarǵy nátije «Qairat» fýtbolshysy Sergei Boichenkoǵa tiesili. Ol 2005-2006 jyldary qaqpasyna 921 minýt boiy dop engizbegen.
