- Premer-Ministr Baqytjan Saǵyntaevtyń aitýynsha, Shaxan kentindegi qaiǵyly oqiǵa jergilikti bilik pen memlekettik organdar arasyndaǵy tyǵyz bailanystyń joqtyǵyn taǵy bir márte dáleldedi.
Búginde energetikalyq qaýipsizdik boiynsha birqatar mindettemeler ákimdikterge júktelgen. Memlekettik organdar da baqylaý sharalaryn júrgizedi. Alaida Shaxandaǵy jarylys siiaqty tótenshe jaǵdailar bolǵanda jergilikti bilik pen memlekettik organdar bir-birine siltep jatady, dep xabarlaidy Ult.kz tilshisi QazAqparat agenttigine silteme jasap.
"Maǵan bir nárse unamai tur, (energetikalyq qaýipsizdik boiynsha - avt.) ókilettilikterdi ózara bólisip, ákimdikterge berdik, aldyq dep otyrsyzdar. Alaida eshqandai jaýapkershilik joq. Endi, ony (memlekettik organdarǵa - avt.) taǵy qaitarý kerek pe, joq álde, qadaǵalaý sharalaryn kúsheitemiz deisizder. Ol durys emes qoi. Ókilettilik berilgennen keiin jergilikti atqarýshy organdar óz mindetterin buljytpai oryndaýy tiis. Bizde energetika ministrliginde energetikalyq qadaǵalaý qyzmeti bar. Ol qaida qarap otyr? Sóitip, jergilikti bilikke ókilettilikti berdik deimiz, olar bolsa, ortalyqtandyrylǵan jylý júiesin qosaiyn desek, ortalyq aqsha bermei otyr dep shyǵady. Ortalyq organdar bolsa, aqsha bereiin desek, jergilikti bilik qujattardy jibermei jatyr deidi. Osylaisha, «fýtbol oinap» otyrady. Aqyr sońynda Shaxan siiaqty eldiń mekenderdiń jylytýǵa qatysty barlyq problemalardy xalyqtyń moinyna artyp qoidyq. Osydan keiin adamdar amal joq, pesh qoiady, "býrjýika" ornatady, neshe túrli qazandyqtardy kirgizedi. Úidi óz kúshimen jylytady. Sosyn keshegidei qaiǵyly oqiǵalarǵa tap bolamyz", - dedi B.Saǵyntaev.
Onyń oiynsha, eger úidi jylytý qondyrǵylary qaýipti bolsa, onda naqty bir talaptardy ázirleý kerek. Osyǵan bailanysty naqty bir qujattyń bolǵany jón. "Bylaisha aitqanda, naqty bir jumysty qolǵa alǵan jón. Biz bolsaq, ái, jylý bolsa boldy dep, salǵyrt qarap otyrmyz", - dep atap kórsetti Úkimet basshysy.
Osy oraida Úkimet basshysy B.Saǵyntaev óz orynbasary Asqar Maminge jergilikti ákimdikter men memlekettik organdardyń ózara jaýapkershiligin naqty belgilep alýdy tapsyrdy. Ol úshin arnaiy jumys toby qurylatyn bolady.
.jpeg)