Aleksei Navalnyi koloniiada meditsinalyq tekseristen ótti, onyń densaýlyǵy - ortasha. Resei qylmystyq jazany oryndaý qyzmetiniń (FSIN) baspasóz hatshysy 25 naýryzda "Interfaks" agenttigine osylai dep habarlady.
Oppozitsiialyq saiasatkerdiń advokattary osy aptada onyń densaýlyǵynyń kúrt nasharlaǵanyn habarlaǵan. Olardyń sózine qaraǵanda, ótken apta sońynan bastap oppozitsionerdiń beli qatty aýyra bastaǵan, aiaǵy da syrqyraǵan.
Advokattary sársenbi kúni ózderin Pokrov qalasyndaǵy koloniiaǵa kirgizbegenin habarlady. FSIN habarlamasynda sársenbi kúni saiasatkerdiń óz ótinishi boiynsha meditsinalyq tekseristen ótkeni jazylǵan.
Saiasatkerdiń áieli Iýliia Navalnaia 24 naýryzda Reseiden Germaniiaǵa taǵy ushyp ketken. Bul týraly qupiia derekkózge súiengen"Interfaks" habarlady. Ózge aqparat aitylmaidy.
Aqpan aiynda kúieýi túrmege jiberilgeli beri Iýliia Navalnaia Germaniiaǵa osymen ekinshi ret baryp otyr. Alǵash ret 10 aqpanda onyń ketkeni belgili bolǵan. Nemistiń Der Spiegel basylymy Navalnaianyń Germaniiaǵa jeke sharýasymen ushyp kelgenin jazdy. Iýliia Navalnaia Reseige 22 aqpanda ushyp kelgen.
Qazir Navalnyidyń balalary shetelde turyp jatyr.
2 aqpanda Máskeýdiń Simonov soty Aleksei Navalnyidy 2013 jylǵy qylmystyq is boiynsha alǵan shartty jazasyn túrme jazasymen almastyrǵan. Sot úkimi boiynsha, saiasatker shamamen 2,5 jyl qamaýda bolady. Ol Máskeýden 110 shaqyrym jerdegi Pokrov qalasyndaǵy №2 koloniiada qamaýda otyr.
2020 jyldyń tamyzynda Aleksei Navalnyi Reseide ýlanyp, eki kúnnen soń Berlindegi klinikaǵa es-tússiz kúide jetkizilgen. Eýropadaǵy birqatar sarapshylar oppozitsionerdiń aǵzasynan qaýipti "Novichok" qaldyqtaryn tapqan. Resei biligi saiasatkerdiń ýlanǵanyn joqqa shyǵarady.
17 qańtarda Navalnyi Reseige orala salysymen áýejaida ustalǵan edi.
