الەكسەي ناۆالنىي كولونييادا مەديتسينالىق تەكسەرٸستەن ٶتتٸ, ونىڭ دەنساۋلىعى - ورتاشا. رەسەي قىلمىستىق جازانى ورىنداۋ قىزمەتٸنٸڭ (فسين) باسپاسٶز حاتشىسى 25 ناۋرىزدا "ينتەرفاكس" اگەنتتٸگٸنە وسىلاي دەپ حابارلادى.
وپپوزيتسييالىق ساياساتكەردٸڭ ادۆوكاتتارى وسى اپتادا ونىڭ دەنساۋلىعىنىڭ كٷرت ناشارلاعانىن حابارلاعان. ولاردىڭ سٶزٸنە قاراعاندا, ٶتكەن اپتا سوڭىنان باستاپ وپپوزيتسيونەردٸڭ بەلٸ قاتتى اۋىرا باستاعان, اياعى دا سىرقىراعان.
ادۆوكاتتارى سەرسەنبٸ كٷنٸ ٶزدەرٸن پوكروۆ قالاسىنداعى كولونيياعا كٸرگٸزبەگەنٸن حابارلادى. فسين حابارلاماسىندا سەرسەنبٸ كٷنٸ ساياساتكەردٸڭ ٶز ٶتٸنٸشٸ بويىنشا مەديتسينالىق تەكسەرٸستەن ٶتكەنٸ جازىلعان.
ساياساتكەردٸڭ ەيەلٸ يۋلييا ناۆالنايا 24 ناۋرىزدا رەسەيدەن گەرمانيياعا تاعى ۇشىپ كەتكەن. بۇل تۋرالى قۇپييا دەرەككٶزگە سٷيەنگەن"ينتەرفاكس" حابارلادى. ٶزگە اقپارات ايتىلمايدى.
اقپان ايىندا كٷيەۋٸ تٷرمەگە جٸبەرٸلگەلٸ بەرٸ يۋلييا ناۆالنايا گەرمانيياعا وسىمەن ەكٸنشٸ رەت بارىپ وتىر. العاش رەت 10 اقپاندا ونىڭ كەتكەنٸ بەلگٸلٸ بولعان. نەمٸستٸڭ Der Spiegel باسىلىمى ناۆالنايانىڭ گەرمانيياعا جەكە شارۋاسىمەن ۇشىپ كەلگەنٸن جازدى. يۋلييا ناۆالنايا رەسەيگە 22 اقپاندا ۇشىپ كەلگەن.
قازٸر ناۆالنىيدىڭ بالالارى شەتەلدە تۇرىپ جاتىر.
2 اقپاندا مەسكەۋدٸڭ سيمونوۆ سوتى الەكسەي ناۆالنىيدى 2013 جىلعى قىلمىستىق ٸس بويىنشا العان شارتتى جازاسىن تٷرمە جازاسىمەن الماستىرعان. سوت ٷكٸمٸ بويىنشا, ساياساتكەر شامامەن 2,5 جىل قاماۋدا بولادى. ول مەسكەۋدەن 110 شاقىرىم جەردەگٸ پوكروۆ قالاسىنداعى №2 كولونييادا قاماۋدا وتىر.
2020 جىلدىڭ تامىزىندا الەكسەي ناۆالنىي رەسەيدە ۋلانىپ, ەكٸ كٷننەن سوڭ بەرليندەگٸ كلينيكاعا ەس-تٷسسٸز كٷيدە جەتكٸزٸلگەن. ەۋروپاداعى بٸرقاتار ساراپشىلار وپپوزيتسيونەردٸڭ اعزاسىنان قاۋٸپتٸ "نوۆيچوك" قالدىقتارىن تاپقان. رەسەي بيلٸگٸ ساياساتكەردٸڭ ۋلانعانىن جوققا شىعارادى.
17 قاڭتاردا ناۆالنىي رەسەيگە ورالا سالىسىمەن ەۋەجايدا ۇستالعان ەدٸ.
